अमेरिकामा भएको गोलीकाण्डमा १२ जनाको मृत्यु

काठमाडौं-संयुक्त राज्य अमेरिकाको भर्जिनियामा रहेको सरकारी भवनमा घटेको गोलीकाण्डमा १२ जना मारिएको रोयटरले जनाएको छ |

घटनामा अन्य छ जना घाइते भएको प्रहरीले जनाएको छ। त्यस्तै संकाश्पद एकजना मारिएका छन् |

प्रहरीका अनुसार सन्दिग्ध व्यक्ति भर्जिनिया बीच सिटीका कर्मचारी हुन् र उनले सरकारी भवनमा ‘अन्धाधुन्ध’ गोली चलाएका थिए।

गोलीकाण्डको जवाफी कारबाहीमा आक्रमणकारी पनि मारिएको प्रहरीले जनाएको छ।

सन्दिग्ध व्यक्तिको पहिचान खुलाइसकिएको छैन। घटनामा एकजना प्रहरी पनि घाइते भएका छन्।

घटना भएको क्षेत्रमा कैयौँ सरकारी भवन छन् र घटनाबारे प्रकाशमा आएपछि प्रहरीले घेरा हाली कर्मचारीहरूलाई निकालेका थिए।

प्रहरी प्रमुख जेम्स सेर्भेराले बन्दुकधारीले प्रहरीमाथि पनि गोली चलाएपछि जवाफी प्रहारमा आक्रमणकारी मारिएको बताए।

बन्दुकधारीले एक्लै घटना गराएको प्रहरीको विश्वास छ।

भर्जिनिया बीच सिटी भर्जिनिया राज्यको सबैभन्दा बढी जनसङ्ख्या भएको शहर हो। त्यहाँको जनसङ्ख्या चार लाख चालीस हजार छ।