देवी खुशी पार्न बालकको बलि

काठमाडौं-नेपाली समाजमा ब्याप्त अन्ध बिश्वासले बेला बेला पत्याउन नै गार्हो हुने गरि घटनाहरु घट्ने गरेका छन् | काठमाडौंबाट आज प्रकाशित मुख्य पत्रपत्रिकाहरुले धनुषा जिल्ला भएको घटनालाई विभिन्न शिर्षकमा प्राथमिकताका साथ समाचार छापेका छन् |

कान्तिपुर दैनिकले ‘अन्धबिश्वाशको पराकाष्ठा” शीर्षकमा लामो समाचार छापेको छ | उस्तै शीर्षकमा राजधानी दैनिकले अन्धविश्वासको पराकाष्ठा, शक्तिशाली बन्ने महत्वकांक्षाले बालकको बलि”भनेर समाचार छापेको छ भने अन्नपूर्ण पोस्टले ‘धामी बन्न बालकको हत्या शिर्षकमा छापेको छ |

समाचार अनुसार धामीझाँक्रीका काममा दखल बढाई शक्तिशाली हुने अन्धविश्वासमा मिथिला नगरपालिका–६ का शम्भुकुमार साहका छोरा साढे दुई वर्षीय छोरा समीरकुमार साहको हत्या गरिएको हो ।

हत्या गर्ने धनुषा जिल्ला मिथिला नगरपालिका-६ का फेकु महतोका छोरा ५५ वर्षीय शत्रुधन महतोलाई प्रहरीले पक्राउ गरी बिहीबार पत्रकार सम्मेलनमार्फत सार्वजनिक गरेको छ ।

गत वैशाख २३ गते बेलुका ५ बजे महतोले आफ्नो घरको ढोकामा फूलको बोटनजिक खेलिरहेको अवस्थामा ती बालकलाई ललाइफकाइ अपहरण गरी आफ्नै घरमा बन्धक बनाएका थिए ।

त्यसको भोलिपल्ट २४ वैशाखको राति २ बजेतिर चमेनिया माय भन्ने देवताका नाममा आफ्नै घर आँगनमा धारिलो हतियारले बालकको घाँटी रेटी मारेको प्रहरीले जनाएको छ ।

हत्यापछि महतोले बालकको शवलाई उनकै घर पछाडि रहेको कृष्णनन्दन महतोको रूख बिरुवासहितको खेतको झारीमा फालेको प्रहरीको प्रारम्भिक अनुसन्धानबाट खुलेको छ ।