दक्षिण कोरियामा बिदेशी नागरिकलाई पनि कोरोना विरुद्धको खोप नि:शुल्क

सोल – दक्षिण कोरिया सरकारले आफ्नो देशका नागरिक सरह बिदेशी नागरिकलाई समेत कोरोना विरुद्धको खोप नि:शुल्क उपलब्ध गराउने भएको छ । खोप कार्यक्रम सुरु भए लगत्तै सम्पुर्ण मानिसहरुलाई नि:शुल्क खोप लगाउने स्वास्थ्य मन्त्रालयले बताएको छ ।

फेब्रुअरीको अन्त्य अथवा मार्च महिनाको सुरुवात बाट खोप कार्यक्रम सुरु गरिने बताउदै कोरियाली रोग तथा प्रकोप नियन्त्रण केन्द्रका प्रमुख जङ इन क्युनले सरकारको खोप कार्यक्रमबाट कोरियाली भुमीमा रहेका कोही पनि बञ्चित हुन नपर्ने बताएका हुन् । उनले हाल खोप ब्यवस्थापनको अन्तिम चरणको काम भइरहेको समेत बताएका छन् ।

दक्षिण कोरियाले आगामी सेप्टेम्बर सम्ममा पहिलो चरणको खोप कार्यक्रम सम्पन्न गरिसक्ने क्युनले बताएका छन् । उनले दक्षिण कोरिया रणनितिक रुपमा अगाडी बढेको बताउदै कोरियाको कोरोना बिरुद्धको लडाई अन्य देशहरु भन्दा अगाडी नै रहेको बताएका छन् ।

यता राष्ट्रपति मुन जाई इनले समेत दक्षिण कोरियाले कोरोना भाइरसबाट विश्वलाई मुक्त गर्न नेतृत्वदायी भुमिका खेल्ने बताएका छन् । चाँडै नै यो रोगका विरुद्ध निर्णायक लडाई हुने बताउदै मुनले नेतृत्व पङ्तिमा आफ्नो देश रहने समेत बताएका छन् ।

दक्षिण कोरियाली सरकारको उक्त निर्णयबाट त्यहाँ काम गरिरहेका नेपालीहरु समेत लाभान्वित हुने भएका छन् । उनीहरुले समेत कोरियाली नागरिकहरु सरह खोप सुविधा पाउने भएका हुन् ।