मैले कसैलाई लपेटो हानेको छैन, कसैको खाएको पनि छैन- प्रचण्ड

काठमाडौँ- नेपाल कम्युनिष्ट पार्टीका अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ले नेता दिनानाथ शर्माको पुस्तक ‘झरीको सौन्दर्य’को लोकार्पण गर्दै प्रचण्डले आफू निकै साहित्यिक मानिस भएको बताएका छन् ।

उनले भने, “मेरो साहित्यमा एकदमै रूची थियो। मेट्रिक पास गरेर कलेज पढ्ने बेला महिनौं बाहिर ननिस्की किताब पढ्थें । आफू पनि कविता लेख्थें। नाचगानमा रूची थियो। लक्ष्मीप्रसाद देवकोटा र ताना शर्माका निबन्धहरू पढेर नेपाली समाजको बारेमा धेरै थाहा पाएँ । साहित्यबाट समाजलाई बुझ्दाबुझ्दै अर्धपागल भएर वि’द्रोहमा गएँ ।”

आफूमा सानैदेखि निकै उदारता, भावुकता र साहित्यिक अनुराग भएको उल्लेख गर्दै प्रचण्डले १० वर्षे सशस्त्र द्वन्द्वका क्रममा आफू कहिल्यै पनि हिंसामा सामेल नभएको बताए। उनले भने, ” मेरो नेतृत्वमा त्यत्रो युद्ध भयो, हजारौंको बलिदान भयो । तर म त्यस्तो विद्रोही नेता हुँ जसले कसैलाई एक लपेटो हानेको छैन, कसैको एक लपेटो खाएको पनि छैन। हिंसात्मक क्रियाकलापमा मेरो कहिँ प्रत्यक्ष सहभागिता छैन । मान्छेहरूलाई यो कुरा पत्याउने गाह्रो छ।”