दक्षिण कोरियामा कोरोनाको तेश्रो लहर सुरु, घरमै बस्न प्रधानमन्त्रीको अनुरोध

सोल – दक्षिण कोरियाको आधा जनसंख्या बसोबास गर्ने राजधानी सोल लगायतका देशका मुख्य शहरहरुमा कोरोना भाइरस संक्रमणका बिरामीहरु एकाएक बढ्न थाले पश्चात स्वास्थ्य अधिकारीहरु चिन्तित बनेका छन् । पछिल्ला केही दिनहरुमा दैनिक ३०० बढी संक्रमित फेला परे पश्चात स्वास्थ्य अधिकारीहरुले कोरोना संक्रमणको तेश्रो लहर सुरु भएको समेत बताएका छन् ।

बरिष्ठ स्वास्थ्य अधिकारी योन ताइ होका अनुसार फेब्रुअरीबाट सुरु भएको कोरोना संक्रमण मार्च महिना सम्म आइपुग्दा दोश्रो लहरमा पुगेको थियो । पछिल्ला दिनहरुमा संक्रमितहरुको संद्या बढेसँगै उनले देशमा कोरोना संक्रमणको तेश्रो लहर सुरु भएको र जाडो मौसममा उक्त संक्रमण थप घातक हुने समेत बताएका छन् ।

संक्रमितहरुको संख्यामा बृद्धि भएसँगै भीडभाड बढी हुने क्षेत्र र शहरहरुमा सामाजिक दुरी नियमलाई कडाई गरिने समेत उनले बताएका छन् । संक्रमण न्युन भएसँगै १.५ तहको सामाजिक दुरी नियम लगाइएकोमा अब चाँडै नै २ तहको सामाजिक दुरी नियम लगाइने भएको छ । मास्क सम्बन्धि नियमलाई समेत कडाई गरिने उनले बताएका छन् ।

यता दक्षिण कोरियाली प्रधानमन्त्री चुङ साई क्युनले देशबासी सम्पुर्ण नागरिकलाई घरमै बसेर कोरोना बिरुद्धको लडाइमा साथ दिन अनुरोध गरेका छन् । कोरोना भाइरससँग सम्बन्धित आफ्नो छैटौँ सम्बोधनका क्रममा उनले केटाकेटी तथा बृद्ध अवस्थाका मानिसहरुलाई बढी सचेत हुन समेत अनुरोध गरेका छन् ।