कोरियामा मास्क नलगाए १ लाख जरिवाना

सोल – दक्षिण कोरियाली राजधानी सोल सरकारले कोरोना संक्रमण फैलन सक्ने सम्भावनालाई मध्यनजर राख्दै सुरक्षा सावधानीमा कडाई गर्ने भएको छ ।

सरकारले आगामी नोभेम्बर १३ बाट मास्क अनिवार्य गर्ने निर्णयमा पुगेको एक अधिकारीले बताएका छन् । यदी कसैले उक्त निर्णयको अटेर गरेमा १ लाख वोन अर्थात ८८ अमेरिकी डलर जरिवाना गरिने समेत सोल सरकारले बताएको छ ।

परिक्षण गरिएको १ महिना पश्चात सरकारले उक्त नियमलाई अनिवार्य बनाउने भएको हो । हाल राजधानी सोलका ब्यस्त क्षेत्रमा उक्त नियमसँग सम्बन्धित ब्यानरहरु समेत राखिएको सोल महानगर सरकारका अधिकारिले बताएका छन् ।

१४ बर्ष मनिका बालबालिका तथा स्वास्थ्य समस्या भएकाहरुका हकमा भने मेडिकल प्रमाणपत्रका अाधारमा उक्त अनिवार्य नियम लागु नगरिने भएको छ । जरिमानामा परेकाहरुले मास्क नलगाउनुको तार्किक कारण पेश गरेमा जरिमाना शुल्कमा २० प्रतिशत छुट दिइने समेत सरकारले बताएको छ ।

सरकारले मानिसहरुको अत्याधिक भीडहुने ५ क्षेत्रमा निषेधाज्ञा समेत जारी गर्ने भएको छ । सभा सम्मेलन, सार्वजनिक यातायात, जुलुस तथा प्रदर्शन, स्वास्थ्य सेवा लिने क्षेत्र तथा नर्सिङ होमहरुमा समेत उक्त निषेधाज्ञा लागु गरिने महानगर सरकारले बताएको छ ।

त्यसका अलावा पहिलो तहको सामाजिक दुरी नियम लागु हुने होटल, रेष्टुरेण्ट लगायतका क्षेत्रमा समेत मास्क अनिवार्य गरिएको छ । सरकारले यो जरिमाना तथा निषेधाज्ञा नागरिकलाई जरिमाना तिराउन भन्दा पनि कोरोना संक्रमण रोक्नका लागि गरिएको समेत स्पस्ट पारेको छ ।