विश्वकप छनौटमा स्पेन र इटाली विजयी

काठमाडौं – – इटालीले लिच्टेनस्टेनविरुद्ध गोलको वर्षा गरे पनि युरोपको विश्वकप छनौट अन्तरगत समूह जीमा स्पेनलाई उछिन्न असफल भएको छ ।

इटालीले ४–० गोलको जीत हात पारे पनि स्पेनले उता म्यासेडोनियाविरुद्ध समान जित हात पार्दै समूहको शीर्ष स्थानमा कायम रह्यो ।

इटालीलाई जित दिलाउन आन्द्रेया बेलोटीले दुई तथा सिरो इमोबाइल र एन्टोनियो कानड्रेभाले एक–एक गोल गरे । स्पेनको जीतमा भिटोलो, नाचो मोनरियाल र आरिट्ज अडुरिजले गोल गरे भने डार्को भिल्कोस्कीले आत्मघाती गोल गरे ।

यता समूहमा इजरायलले अल्बानियालाई हराउँदै तेस्रो स्थानमा उक्लियो ।

अल्बानियामा हुने खेल सुरक्षाको कारणले स्कोडरबाट एल्बासानमा सार्न परेको थियो । मिडिया रिपोर्टका अनुसार खेलमा आक्रमण गर्ने तयारी गरेका १५ आतंकवादीलाई खेलअघि पक्राउ गरिएको थियो ।

उता, समूह डीमा वेल्स भने सर्बियासँग रोकिएको छ । गेराथ बेलले वेल्सलाई अग्रता दिलाए पनि खेल सकिन ५ मिनेटअघि अलेक्सान्डर मिट्रोभिचले बराबरी गोल गरेका थिए ।

रिपब्लिक अफ आयरल्याण्डले अस्ट्रियालाई १–० ले पराजित गरेपछि समूहको शीर्ष स्थानमा उक्लेको छ । सर्बिया दोस्रो स्थानमा रहेको छ भने वेल्स तेस्रो स्थानमा सिमित बनेको छ ।

समूह आइ मा क्रोएसियाले आइसल्याण्डलाई पराजित गर्दै शीर्ष स्थानमा उक्लेको छ । फिनल्याण्डलाई पराजित गर्दै युक्रेन दोस्रो स्थानमा उक्लेको छ भने आइसल्याण्ड तेस्रो स्थानमा खस्केको छ ।