उत्तर कोरियामा पुनर्निर्माण गरिएका ८ सय २० घर बस्नै नमिल्ने

सोल – यस बर्ष फरक फरक समयमा आएका समुद्री आँधीले उत्तर कोरियालाई ठूलै प्रभाव पारेको छ । समुद्री आँधी लगत्तै त्यहाँका सर्वोच्च नेता आफै आँधी प्रभावित क्षेत्रको अवलोकन भ्रमणमा समेत गएका थिए । अवलोकन पश्चात निश्चित समय सीमा तोकेर पुनर्निर्माण गर्न निर्देशन समेत दिएका थिए ।

किमको निर्देशन कार्यान्वयन भएता पनि काममा गुणस्तरीयता भने नपाइएको रेडियो फ्री एसियालाई उदृढ गर्दै द कोरिया हेराल्डले समाचार छापेको छ । अपुष्ट श्रोतलाई उल्लेख गर्दै समाचारमा भनिएको छ- उत्तर कोरियाली सरकारले पुनर्निर्माण गरेका अधिकांश संरचनाहरु बस्नका लागि अयोग्य छन् । किमले ब्यक्तिगत रुपमा अवलोकन गरेका बाहेक अन्य कुनै पनि संरचना काम लाग्ने नभएको समाचारमा बताइएको छ ।

पुनर्निर्माण गरिएका कतिपय घरहरुमा पानीको सुविधा नभएको, तातोको ब्यवस्था नभएको लगायत कुनै न कुनै तवरका कमजोरी रहेको स्थानियले जानकारी दिएको समाचारमा बताइएको छ ।

कामको प्रगति तथा प्रकृति नहेरी त्यहाँको वर्कर्स पार्टीको स्थापना दिवस सम्ममा पुनर्निर्माण कार्य अनिवार्य सक्न दिएको निर्देशनका कारण उक्त क्षेत्रमा गरिएका अधिकांश पुनर्निर्माण गतिविधिहरु कच्चा सावित भएका हुन् । किमले उक्त क्षेत्रका पुनर्निर्माण कार्य अक्टोबर १० अगाडी जसरी पनि सक्न निर्देशन दिएका थिए ।

उत्तर कोरियाली सरकारी समाचार संस्था केसिएनएले उक्त मिति अगावै दुई महिनाक‍ो अवधिमा ८२० वटा घरहरुको पुनर्निर्माण सम्पन्न गराई सर्वसाधारणलाई हस्तान्तरण गरिएको बताएको थियो । यता रेडक्रसले समुद्री आँधी प्रभावित ह्वाङ्गाई तथा काङ्गवन प्रान्तका करिव ३००० घर परिवारलाई राहत सामाग्री समेत उपलव्ध गराएको थियो ।