उत्तर कोरियालाई ऋणको भारी – ८ सय ७५ मिलियन डलर दक्षिणको तिर्न बाँकी

सोल- उत्तर कोरियाले दक्षिण कोरियालाई ठूलो परिमाणमा ऋण तिर्न बाँकी छ । यता दक्षिण कोरियाले भने उत्तर कोरियाले उक्त ऋण रकम फिर्ता गर्ने बारेमा शंका प्रकट गरेको छ ।

दक्षिण कोरियाली सरकारका अनुसार उसले उत्तर कोरियालाई विभिन्न शिर्षकमा १ ट्रिलियन वन भन्दा बढी रकम उत्तर कोरियालाई ऋणका रुपमा दिएको छ । खाद्य समस्या पुरा गर्न मात्र दक्षिण कोरियाले ८७५ मिलियन डलर ऋण साहायता गरेको छ ।

त्यस्तै उत्तर कोरियाले भौतिक पुर्वाधार विकासका लागि भन्दै १३० मिलियन डलर ऋण लगेको छ । कपडा, जुत्ता तथा साबुन लगायतका सामाग्री खरिद गर्न उत्तरले दक्षिण कोरियासँग ८० मिलियन डलर ऋण लिएको छ । बैंक अफ कोरियासँग लिइएको उक्त ऋण सन् २००० बाट २००८ सम्म लिइएको थियो ।

लिइएको सम्पुर्ण रकम २० बर्ष भित्रमा फिर्ता गरिसक्ने प्रतिबद्धता उत्तर कोरियाले गरेको थियो । १ प्रतिशत ब्याजदरमा उक्त ऋण रकम उत्तर कोरियालाई उपलब्ध गराइएको थियो ।

कुल ऋण रकमको २.३ प्रतिशत अर्थात २.३ मिलियन डलर भने फलामजन्य सामाग्रीका माध्यमबाट फिर्ता लिइएको छ । बाँकी ऋण रकम फिर्ता गर्न उत्तर कोरियालाई ६२ पटक ताकेता गरिएता पनि कुनै प्रतिकृया नआएको दक्षिण कोरियाली अधिकारीले बताएका छन् ।