उत्तर कोरियामा ९० प्रतिशत सैन्य कमाण्डर हेरफेर

सोल – उत्तर कोरियाली सर्वोच्च नेता किम जोङ उनले देशका आणविक हतियार विभाग हेर्ने विभाग प्रमुख परिवर्तन गरेका छन् । उनले जेनरल किम राक ग्योमलाई जिम्मेवारी मुक्त गराई उनको सट्टामा लेफ्टिनेन्ट जेनरल किम जोङ जिललाई नियुक्ति गरिएको छ ।

किमले उक्त निर्णय किन गरे भन्ने बारेमा यकिन नभएता पनि हालै आयोजना गरिएको सैन्य परेडमा उक्त परिवर्तन त्यहाँको राष्ट्रिय टेलिभिजन मार्फत देख्न सकिन्थ्यो । समाचार अनुसार किम जोङ उनले करिव ९० प्रतिशत सैन्य कमाण्डरहरु परिवर्तन गरिएको छ । किमले आफ्ना बुबा किम जोङ इलका नाममा सैन्य एकेडेमी स्थापना समेत गरेका छन् ।

किम जोङ उन सत्तामा आए लगत्तै सन् २०१२ पश्चात उत्तर कोरियाली सैनिकमा रणनैतिक तथा आणविक विभाग सम्हालेका किम राक ग्योमलाई नेता किम जोङ उनले पदबाट हटाएको बताइएको छ । उनले सैन्य क्षमतामा सुधार ल्याउन तथा आणविक क्षेत्रमा ब्यापक स्तरिकरण गर्न किमले उक्त कदम चालेको हुन सक्ने समाचारमा बताइएको छ ।

हाल नियुक्ति पाएका लेफ्टिनेन्ट जेनरलका बारेमा भने अन्तराष्ट्रिय जगतमा कुनै प्रकारको सुचना नभएको उत्तर कोरिया बारे जानकार विज्ञहरुले बताएका छन् ।