दक्षिण कोरियामा यौनिक अल्पसंख्यकहरुलाई आशिर्वाद दिने पाष्टर निलम्बित

सोल – दक्षिण कोरियाको मेथोडिष्ट चर्चले पाष्टर ली डोङ ह्वाङलाई २ बर्षका लागि निलम्बित गरेको छ । गत बर्षको अगष्टमा एक पर्वका अवसरमा दिएको आशिर्वादको बिषयलाई लिएर चर्चले उनीमाथि कारवाही गरेको हो ।

मेथोडिष्ट चर्चको ख्योङ्गी प्रान्त शाखाको न्यायिक समितिले उनलाई निलम्बन गरेको हो । निलम्बनमा परेसँगै उनले अब कुनै पनि सार्वजनिक धार्मिक गतिविधिहरुमा सहभागिता जनाउन पाउने छैनन् । उनलाई मेथोडिष्ट चर्चका तर्फबाट आशिर्वाद दिन तथा प्रार्थना गर्न समेत रोक लगाइएको छ ।

लीलाई चर्चको नियम मिचेको आरोपमा गत अगष्टबाट नै परिक्षणमा राखिएको थियो । चर्चले अनावश्यक असामाजिक कार्य गर्ने, लागु औषधको प्रयोगलाई प्रश्रय दिने तथा समलिङ्गी सम्बन्धलाई स्विकार्ने जस्ता कार्यलाई बर्जित गरेको छ । यदि चर्चका कसैले त्यसस्ता गतिविधिमा संलग्नता जनाएमा चर्चले उनीहरुलाई निलम्बन देखि पद नै खोस्ने सम्मको कारवाही गर्दछ ।

लीले सन् २०१९ को अगष्ट ३१ मा एक कार्यक्रममा सहभागिता जनाएका थिए । उक्त कार्यक्रममा तेश्रो लिङ्गीहरुको उपस्थिति थियो भने उनले ति तेश्रो लिङ्गीहरुको पक्षमा रहेर भाषण गरेका थिए भने ईन्द्र्णी रङको पोषाक लगाएर उनीहरु प्रति ऐक्यवद्धता समेत जनाएका थिए ।

यता लीका पक्षधर वकिलहरुले भने उनले उक्त कार्यक्रममा गरेको भाषणका क्रममा कहीँ कतै पनि यौनिक अल्पसंख्यकहरुलाई समर्थन गर्ने अभिव्यक्ति नदिएको दावी गरेका छन् । उनीहरुले चर्चको निश्पक्षतामा शंका समेत व्यक्त गरेका छन् । ली ले समेत उक्त निर्णय विरुद्ध पुनर्विचार गर्न अपिल गर्ने बताएका छन् ।