जापानले दक्षिण कोरियासँगको ब्यापारिक भ्रमणलाई पुन: सुचारु गर्ने

सोल – जापान तथा दक्षिण कोरियाले यसै साताबाट छोटो तथा लामो समयका लागि ब्यापारिक भ्रमणलाई पुन: सुचारु गर्ने भएका छन् । कोरोना भाइरसबाट थलिएको अर्थतन्त्र चलायमान बनाउन ब्यापारिक भ्रमणलाई पुन: सुचारु गर्न लागिएको अधिकारीले बताएका छन् ।

छोटो समयको ब्यापारिक प्रयोजनका लागि गरिने भ्रमणका क्रममा कोरोना परिक्षण रिपोर्ट नेगेटिभ भए क्वारेन्टाइनमा बस्न नपर्ने गरि व्यवस्था गरिन लागिएको दुबै देशका अधिकारीले बताएका छन् । त्यसका लागि भ्रमण गर्ने व्यक्तिले आफ्नो भ्रमण विवरण भने विस्तृत रुपमा उपलब्ध गराउनु पर्ने छ ।

दीर्घकालीन व्यवसायीक भ्रमण गर्नेहरुको हकमा भने दुबै देश प्रवेशमा कोरोना परिक्षण रिपोर्ट अनिवार्य गरिने छ भने १४ दिनको सेल्फ क्वारेन्टाइन समेत अनिवार्य रहने छ ।

यो नयाँ आर्थिक गतिविधि सँगै जापानले दुई देश बीच युद्धका समयबाट चिसिएको सम्बन्ध समेत सुमधुर बन्न सक्ने आशा ब्यक्त गरेको छ । जापानले कोरियाली नागरिकलाई युद्धबन्दी बनाएको र त्यसको क्षतिपुर्ति नदिएको भन्दै दक्षिण कोरिया जापानसँग रुष्ट छ ।

यदि उक्त ब्यवसायीक भ्रमण पुन: सुचारु गरिएमा कोरिया जापानमा ब्यवसायिक भ्रमण गर्ने दोश्रो देश हुने छ । यस अघि सिङ्गापुरसँग जापानले ब्यवसायिक भ्रमण सुरु गरिसकेको छ । जापानले थाइल्याण्ड तथा भियतनाम लगायतका अन्य ९ देशहरुमा समेत ब्यवसायिक भ्रमण सुरु गर्ने समाचार रोयटर्स को सहयोगमा द कोरिया टाइम्सले प्रकाशित गरेको छ ।