दक्षिण कोरियाली अधिकारीको उत्तरमा हत्या गरि जलाइयो

सोल – दक्षिण कोरियाका एक सरकारी अधिकारीलाई उत्तर कोरियाले गोली हानी हत्या गरे पश्चात उनको शव जलाएको दक्षिण कोरियाली रक्षा मन्त्रालयले जनाएको छ । गत हप्ताबाट हराइरहेका ती अधिकारीलाई उत्तर कोरियाले हत्या गरेको दक्षिण कोरियाली रक्षा मन्त्रालयले पुष्टी गरेको हो ।

देशको पश्चिमी क्षेत्रको यीयोनप्योङ क्षेत्रमा ड्युटीमा रहेका ४७ बर्षिय उनलाई डुङ्गाबाटै पक्राउ गरेर हत्या गरिएको मन्त्रालयले जनाएको छ । समुद्र तथा माछा मन्त्रालयका कर्मचारी समेत रहेका उनी कामको सिलसिलामा उत्तर कोरियाली सीमा क्षेत्रमा पुगेका थिए ।

आफूलाई उत्तर कोरियाली अधिकारीले पक्राउ गर्ने कोशीस गरेपछि प्रतिकार गर्ने क्रममा उनलाई हत्या गरि घटनास्थलमा नै उनको शव जलाइएको दक्षिण कोरियाली रक्षा मन्त्रालयले जनाएको छ ।

कोरोना संक्रमण फैलन सक्ने आशंकामा उत्तर कोरियाले सीमा क्षेत्रमा ब्यापक कडाई गरिरहेको छ ।

पछिल्लो पटक आफ्नो सीमा क्षेत्रको एक किलोमिटर आसपासमा कोहीलाई देखेमा सिधै गोली हान्ने अधिकार उत्तर कोरियाली सिमामा तैनाथ सैनिकहरुलाई दिइएको छ । पछिल्लो उक्त घटना उत्तरको सोही निर्देशनकै परिणाम हुन सक्ने समेत मन्त्रालयले बताएको छ ।