पुन निर्माणमा प्रगती भएपछि किम खुशी

सोल – उत्तर कोरियाली सर्वोच्च नेता किम जोङ उनले समुद्री आँधी प्रभावित क्षेत्र उत्तरी ह्वाङ्हाई क्षेत्रको दोश्रो पटक अवलोकन भ्रमण गरेका छन् ।

उत्तर कोरियाली सञ्चार माध्यम केसिएनएका अनुसार उनले दिएको पुनर्निर्माणको निर्देशन पश्चातका प्रगति बुझ्न त्यस क्षेत्रको भ्रमण गरेका हुन् ।

उम्फा क्षेत्रको बाढी अति प्रभावित तिचोङ-री क्षेत्रमा एक महिना भित्र दोश्रो पटक भ्रमण गर्दै निर्माण प्रगति तथा आगामी योजनाबारे किमले अवलोकन गरेका हुन् ।

आँधी पश्चात आएको बाढीका कारण ९०० बढी घर तथा ६०० हेक्टर क्षेत्रमा लगाइएको धानबाली नष्ट भएपछि किम उक्त क्षेत्रको पुनर्निर्माण प्रति बढी संवेदनशील देखिएका हुन् ।

केसिएनएका अनुसार अघिल्लो भ्रमणमा निकै रुष्ट बनेका किम पुनर्निर्माण प्रगति देखेर भने खुसी भएका छन् । भ्रमणका क्रममा किमले उक्त क्षेत्रमा मजबुत पुनर्निर्माण गर्न भनेका छन् ।

किमको यो भ्रमण उनले जनताप्रति देखाएको सद्भाव तथा सम्मान भएको केसिएनएले टिप्पणी गरेको छ ।

यो क्षेत्रमा यस महिनामा मात्र ३ वटा समुद्री आँधी आइसकेका छन् भने आँधी र आधीकै कारण आएको बाढीका कारण जनजीवन कष्टकर बनेको छ । समाचार अनुसार उक्त क्षेत्र उत्तर कोरियाको प्रमुख धान उत्पादन हुने क्षेत्र हो ।