उत्तर कोरियाली नेता किमले गरे आँधी प्रभावित क्षेत्रको भ्रमण, राखे आकस्मिक बैठक

सोल – उत्तर कोरियाली सर्बोच्च नेता किम जोङ उन समुद्री आँधी बाभी तथा मायास्क प्रभावित क्षेत्रको भ्रमणमा गएका छन् । आँधीका कारण अति प्रभावित बनेको देशको हाम्क्योङ प्रान्तमा उनले प्रत्यक्ष भ्रमण गरेका हुन् । भ्रमण लगत्तै बाढी प्रभावित क्षेत्रमा क्षति भएका संरचनाहरुको पुननिर्माण कसरि गर्ने भन्ने बिषयमा सत्तारुढ दलको पोलिटब्युरो बैठक समेत राखेका छन् ।

भ्रमणका क्रममा किमले समुद्री आँधी मायास्क प्रभावित क्षेत्रका संरचनाहरुको अवलोकन गरेका थिए । उत्तर कोरियाली सञ्चार माध्यम केसिएनएले बताए अनुसार शक्तिशाली समुद्री आँधीले उक्त क्षेत्रमा १००० बढी घर भत्काएको छ ।

अवलोकन पश्चात बसेको पार्टी बैठकलाई सम्बोधन गर्दै किमले बाढी प्रभावित क्षेत्रका संरचनाहरु पुननिर्माण गर्नका लागि विषेश कार्यदल गठन गर्दै आवश्यक सामानहरुको ढुवानी ब्यवस्था मिलाउन समेत निर्देशन दिएका छन् । काम गर्ने टोलीलाई तत्काल उक्त क्षेत्रमा खटाउन समेत उनले निर्देशन दिएका छन् ।

बैठकका क्रममा किमले पार्टीका केन्द्रिय सदस्यहरुलाई पिडित परिवारहरुलाई राहत सहयोग व्यवस्थापन गर्न समेत निर्देशन दिएका छन् । उनले आँधी प्रभावित क्षेत्रका सम्बद्ध अधिकारीहरुलाई जनताको जीउधनको सुरक्षा गर्न नसकेको तथा समयमै उनीहरुलाई सुरक्षित स्थानमा लैजान नसकेको भन्दै कारवाही गर्न निर्देशन समेत दिएका छन् ।