दक्षिण कोरियामा ८ दिन कडा लकडाउन , रेष्टुरेन्टमा बस्न समेत नपाइने

सोल – दक्षिण कोरियाली राजधानी सोल तथा आसपासका क्षेत्रमा तीब्र रुपमा फैलिरहेको कोरोना संक्रमण प्रभावलाई कम गर्ने उद्देश्यका साथ सामाजिक दुरीमा कडाई गर्न थालिएको छ ।

सोही क्रममा राजधानी सोलका रेष्टुरेन्ट, कफि सप, बेकरी लगायतका मानिस भीडभाड हुने क्षेत्रहरुको सञ्चालनमा रोक लगाइएको छ ।

सरकारको योजना अनुरुप अब सोल क्षेत्रका रेष्टुरेन्टहरुले ‘टेक अवे’ सुविधा उपलब्ध गराउनु पर्ने छ भने रेष्टुरेन्टहरु बेलुकीको ९ बजे सम्म मात्र खोल्न पाइने छ । होम डेलिभरीको समय बेलुका ९ बजेबाट बिहान ५ बजे सम्म तोकिएको छ । कफिसपका हकमा सञ्चालन अवधिभर मात्र टेक अवे र डेलिभरी गर्न पाइने नियम बनाइएको छ ।

टेक अवे सेवा लिन चाहाने ग्राहकहरुले रेष्टुरेन्ट प्रवेश गर्दा व्यक्तिगत विवरण फारम भर्नु पर्ने छ भने मास्कको प्रयोग तथा सामाजिक दुरी अनिवार्य गरिएको छ । करिव ५ करोड जनसंख्या भएको दक्षिण कोरियाको आधा जनसंख्या राजधानी सोल आसपासका क्षेत्रमा बसोबास गर्ने भएकाले स्वास्थ्य सावधानी अपनाइएको सोल महानगरले जनाएको छ ।

सरकारले पछिल्ला दिनहरुमा संक्रमण रोकथामका लागि इनडोर गतिविधिहरुमा समेत बन्देज लगाउन थालेको छ । जिमहल, फिटनेस सेन्टर, विलियार्ड हल लगायतका इनडोर गतिविधि सञ्चालन हुने स्थलहरु समेत बन्द गर्न थालिएको सरकारी अधिकारीहरुले जनाएका छन् ।

पछिल्लो पटक संक्रमण ह्वात्तै बढेपछि सरकारले एक तिहाई कर्मचारीलाई मात्र कार्यालय बोलाउने र अन्यलाई वर्क फ्रम होम ब्यवस्था लागु गर्ने तयारी थालेको छ । हाल लागु गरिएका नियम एक हप्ता मुल्याङ्कन गरि आवश्यकता अनुसार थप नियम ल्याइने सरकारले बताएको छ ।