मोरङको कानेपोखरीमा ‘फूड बैंक’ स्थापना

मोरङ- कोरोना संक्रमण फैलिएसँगै गरिएका निषेधाज्ञाका कारण दैनिक ज्यालादारीमा मजदुरी गर्ने मजदुरहरुको घरमा चुल्हो बल्नै धौधौ परिरहेको हालको अवस्थामा मोरङ जिल्लाको कानेपोखरी स्थित विभिन्न युवा समुहहरुले सामुहिक रुपमा फूड बैंक स्थापना गरेका छन् । “हुनेले दिएर जानुहोला, नहुनेले लिएर जानुहोला” भन्दै उनीहरुले गाउँपालिकाको बरगाछी चोकमा उक्त फूड बैंक स्थापना गरेका हुन् ।
रमाईलो जेसिस, लाइन्स क्लव अफ कानेपोखरी, ब्यापार प्रबन्ध समिति रमाइलो तथा रेडक्रस सोसाइटी बयरबन उपशाखा को संयुक्त व्यवस्थापनमा सञ्चालित उक्त फूड बैंक सञ्चालनको नेतृत्व रमाईलो जेसिसले गरेको छ । जेसिसका अध्यक्ष सुमन अधिकारीले यो समय सबै मिलेर बच्ने र बचाउने समय भएको र यस्तो पुनित कार्यमा सहजीकरण गर्न पाउँदा आत्मसन्तुष्टी मिलेको बताएका छन् ।
स्थानीय जनताहरुको सकारात्मक प्रतिकृया पश्चात सञ्चालित उक्त फूड बैंकमा प्रसस्त खाद्यान्न जम्मा हुन थालेको पनि अधिकारीले बताए । हाल एक ठाउँमा मात्र सञ्चालित उक्त फूड बैंक चाँडै नै गाउँपालिकाका अन्य क्षेत्रमा समेत सञ्चालन गरिने अधिकारीले बताएका छन् ।
खान नपाएर कसैले पनि ज्यान गुमाउने परिस्थिति नआओस् भन्दै संस्थाहरुले सामुहिक रुपमा उक्त फूड बैंक स्थापना गरेका हुन् । प्रवासी नेपालीहरुले समेत उक्त अभियानलाई सघाउने प्रतिवद्धता आए पछि आफूहरुमा थप हौसला बढेको बताउँदै संयोजक अधिकारीले आफ्नो केही गाँस काट्दा अरुको ज्यान बच्ने भएकाले सक्ने जतिलाई उक्त बैंकमा गएर आफूले सक्ने खाद्यान्न जम्मा गरिदिन अनुरोध समेत गरेका छन् ।