उत्तर कोरियाद्वारा पानीजहाजमा मारिएका आफ्ना नागरिकको क्षतिपूर्ति माग

सोल-उत्तर कोरियाले सन् १९४५ मा स्वदेश फर्किरहेका आफ्ना ५२४ जना नागरिकको हत्या गरेको भन्दै जापानसँग क्षतिपूर्ति माग गरेको छ ।

सोमबार एक विज्ञप्ति मार्फत उत्तर कोरियाले उक्त घटनालाई लिएर जापानले आफूसँग माफि माग्नुपर्ने तथा क्षतिपूर्ती उपलव्ध गराउनु पर्ने बताएको हो ।

दोश्रो विश्वयुद्धका बेला जापानले जबरजस्ति आफ्ना नागरिकहरुलाई युद्धमैदानमा लगेको बताउँदै उत्तर कोरियाली प्रबक्ताले जापानलाई आफूलाई लागेको अपराधको दाग मेटाउन समेत भनेका छन् । उनले जापानलाई पीडित परिवारलाई क्षतिपूर्ति उपलव्ध गराई अपराधको पुस्तक बन्द गर्न समेत भनेका छन् ।

सन् १९४५ को अगष्टमा दोश्रो विश्व युद्ध पश्चात करिव ४ हजार कोरियाली नागरिक बोकेर बुसान क्षेत्रतर्फ जाँदै गरेको उक्त पानी जहाज अमेरिकी सेनाले राखेको धरापमा परि विष्फोट हुँदा आफ्ना त्यति नागरिकहरु मारिएको बताउँदै क्षतिपूर्ति माग गरेको उत्तर कोरियाली सरकारी सञ्चार माध्यम केसिएनएले जनाएको छ ।

सन् २००१ मा जापानको एक जिल्ला अदालतले सोही मुद्धामा फैसला गर्दै उक्त घटनामा परेका १५ परिवारलाई ४५ मिलियन येन क्षतिपूर्ति उपलब्ध गराउन भनेको थियो भने अन्यको हकमा भने सम्बन्ध स्पष्ट हुन नसकेको भन्दै पटक पटक मुद्धा सर्दै आएको छ ।

पछिल्लो पटक जापानबाट स्वतन्त्र भएको ७५ औँ बार्षिकोत्सब पश्चात उत्तर कोरियाले उक्त मुद्धा पुनः उठाएको हो ।