अफगानिस्तानमा बम विस्फोट, दुई बालबालिकासहित सात जना मारिए

काबुल – पूर्वी अफगानिस्तानको सडक क्षेत्रमा भएको बम विस्फोटमा सात जनाको ज्यान गएको छ।

प्रान्तीय गभर्नरका प्रवक्ता वाहिदुल्लाह जमुजादाका अनुसार गजनी प्रान्तको जघातु जिल्लामा सवारी साधानमा बम विस्फोट हुँदा तीन महिला, दुई बालबालिका र दुई पुरुषको मृत्यु भएको हो।

अफगानिस्तानमा शान्तिवार्ता, सम्झौता र युद्धपश्चात अफगानिस्तानको लागि निकास खोज्ने प्रयासको बावजुद पनि अफगानी नागरिकहरु मुलुकभर हिंसाको चपेटामा परेका छन्।

संयुक्त राष्ट्र संघले जुलाईमा सार्वजनिक गरेको तथ्यांकअनुसार सन् २०२० को छ महिनामा अफगानिस्तानमा हिंसात्मक आक्रमणबाट एक हजार दुई सय ८२ मानिस मारिएका छन्। सयौं मानिसहरु घाइते भएका छन्।

दुई दशकदेखि आतंकवादी समूहहरु र सरकारबीचको द्वन्द्व महिना र बालबालिका बढी प्रभावित भएका छन्। हिंसामा परी ४० प्रतिशत नागरिकले ज्यान गुमाएका छन् भने त्यति नै संख्यामा घाइते पनि भएको राष्ट्र संघले उल्लेख गरेको छ।

अफगानिस्तानमा युद्धविराम गर्न तालिवानसँग पटकपटक वार्ता भएर एक चरणको शान्ति सम्झौता भए पनि अझै हिंसा रोकिएको छैन। तालिवानले सरकारले आफ्ना सबै लडाकुहरू रिहा गर्नुपर्ने माग गरेको छ। तर यसमा सहमति जुट्न नसक्दा शान्तिप्रक्रिया अगाडि बढ्न सकेको छैन।