नेकपा स्थापना दिवस भव्य समारोहबीच सुरु

काठमाडौं : तत्कालीन नेकपा एमाले र माओवादी केन्द्रबीच भएको एकतापछि नेपाल कम्युनिस्ट पार्टीले सोमबार नेकपाको ७० औं स्थापना दिवस मनाउँदै छन्।कमलादीस्थित प्रज्ञा भवनमा कार्यक्रम आयोजना गरिएको छ। कार्यक्रममा प्रधानमन्त्रीसमेत रहेका अध्यक्ष केपी शर्मा ओली र अध्यक्ष पुष्पकमल दाहाल प्रचण्डको फोटो राखिएको छ। यता, पाँचजना संस्थापकको तस्विर पनि सचिवालय सदस्य बस्ने मञ्चको पछाडि राखिएको छ। संस्थापकहरूसँगै तत्कालीन एमालेका महासचिव मदन भण्डारीको तस्वीर पनि राखिएको छ। मदन भण्डारीको तस्बिर चारजना स‌ंस्थापकहरूभन्दा माथि ठूलो आकारमा राखिएको छ। भण्डारी र संस्थापक पुष्पलालको फोटो सँगसँगै, एउटै आकारमा राखिएको छ भने अन्य चारजना संस्थापकका तस्बिर दुईजनाको भन्दा तल सानो आकारमा राखिएको छ। मदन भण्डारी कम्युनिष्ट पार्टीका संस्थापक नभए पनि कम्युनिष्ट आन्दोलनलाई पछिल्लो कालखण्डमा जनताको बहुदलिय जनवादका नामबाट शान्तिपूर्ण राजनीतिमा अवतरण गराउन सफल नेताका रुपमा परिचित छन्।

गतवर्ष पार्टी एकता नहुँदै मनाइएको नेकपा स्थापना दिवसमा भने संस्थापकसँगै मदन भण्डारी र मनमोहन अधिकारीको फोटो ब्यानरमा राख्दा विवाद भएको थियो। राष्ट्रिय सभागृहमा मनाइएको उक्त स्थापना दिवसमा विवाद भएपछि ब्यानर नै परिवर्तन गर्नुपरेको थियो। गतवर्ष नै मदन भण्डारीको निधन भएको दिन जेठ ३ गते तत्कालीन एमाले र माओवादी केन्द्रबीच एकता घोषणा भएको थियो।यसपटक मनमोहन अधिकारीको फोटो भने राखिएको छैन । आजको स्थापना दिवसमा भने तस्बिरको विषयलाई लिएर विवाद छैन। नेकपाले आजै पार्टी एकतालाई टुंगोमा पुर्‍याउने तयारी गरेका छन्। तर जिल्ला तहमा एकताले टुंगो पाएको छैन। यसले आजै पूर्णता पाउने बताइएको छ।