दुई अध्यक्षबीच वार्ता, महासचिव र  दुई स्थायी कमिटी सदस्य सहभागी

काठमाडौं – नेपाल कम्युनिष्ट पार्टी (नेकपा) का दुई अध्यक्ष कपी शर्मा ओली तथा पुष्पकमल दाहाल ‘प्रचण्ड’बीच बालुवाटारमा वार्ता जारी छ । दुई अध्यक्षबीच साउन २० गतेपछि पहिलो पटक वार्ता भएको हो । पार्टीमा देखिएको विवाद सल्टाउन प्रयास स्वरुप अध्यक्ष प्रचण्ड प्रधानमन्त्री तथा अर्का अध्यक्ष ओलीलाई भेट्न दिउँसो ११ः१५ मा बालुवाटार पुगेका हुन् ।
प्रधानमन्त्रीका सञ्चार विज्ञ रामशरण बजगाईकाअनुसार वार्तामा दुई अध्यक्ष बाहेक महासचिव विष्णु पौडेल र स्थायी कमिटका सदस्यहरु शंकर पोखरेल र जनार्दन शर्माको पनि सहभागिता छ । यसअघि साउन २० गते दुई अध्यक्षबीच वार्ता भएको थियो ।

साउन २१ गते विहानका लागि तय भएको वार्ता हुन नसकेपछि आज नौ दिनपछि दुई अध्यक्षबीच बार्ता भइरहेको छ । यसबीचमा आफ्ना पक्षीय बैठक र छलफल जारी राखेका दुवै अध्यक्षले सहमतिको प्रयास सकारात्मकरुपमा अगाडि बढिरहेको बताएका छन् ।
प्रधानमन्त्री ओलीले बुधाबर एक मिडियामा अन्तरवार्ता दिनुहुँदै पाँच दिनभित्र पार्टीको आन्तरिक विवाद सल्टिने जानकारी गराएका थिए । पार्टीभित्र देखिएको विवाद सल्टाउन दोस्रो तहका नेताहरु गम्भीर गृहकार्यमा रहेको पार्टी स्रोतले बताउने गरेको छ ।