विराटनगकरका अस्पताल कोरोना संक्रमण केन्द्र बन्दै, एकै दिन १० स्वास्थ्यकर्मी संङ्क्रमित

विराटनगर : विराटनगरमा अस्पतालमा कार्यरत स्वास्थ्यकर्मी संक्रमित हुनेको संख्या बढ्दै गएसँगै कोरोना भाईरस (कोभिड–१९) संक्रमणको केन्द्र नै अस्पताल बन्न थालेका छन् ।

ट्राभल्स हिस्ट्री बिना नै स्वास्थ्यकर्मीमा सुरु भएको संक्रमणले उनीहरुसम्म स्वास्थ्य परीक्षणका लागि आएका विरामीमा समेत जोखिम बढेको छ ।

मंगलबार मात्रै विराटनगरका दुई अस्पतालका १० जना स्वास्थ्यकर्मी तथा कर्मचारीलाई संक्रमण पुष्टि भएको छ । विराटनगरमा १८ जनामा मंगलबार संक्रमण पुष्टि भएको विराटनगर महानरपालिका जनस्वास्थ्य महाशाखा प्रमुख रमेश कार्कीले जानकारी दिनुभयो ।

संक्रमितमध्ये एकजना चिकित्सकसहित सातजना कोशी अस्पतालमा कार्यरत स्वास्थ्यकर्मी हुन् । आइतबार साँझ कोशीको पोस्टनेटल वार्डमा कार्यरत एकजना नर्समा कोरोना संक्रमण पुष्टि भएपछि सोमबार उनैको सम्पर्क पहिचानका आधारमा ३१ जनाको स्वाब संकलन गरिएकोमा ७ जनाको पोजेटिभ आएको हो ।

यसैगरी विराट नर्सिङ होम (विराटनगर अस्पताल) का तीनजनालाई कोरोना संक्रमण पुष्टि भएको छ । विराटका सञ्चालकलाई अघिल्लो हप्ता मंगलबार संक्रमण पुष्टि भएको थियो । त्यसपछि सम्पर्क पहिचानका आधारमा आइतबार चारजना नर्समा संक्रमण पुष्टि भएको थियो ।

मंगलबार थप तीनजनामा संक्रमण पुष्टि भएको हो । विराटनगर ६ मा ३८ र ५४ वर्षीय दुई पुरुष, विराटनगर–१० मा ३७ वर्षीया महिला र ३५ वर्षीय पुरुष, विराटनगर–१३ मा एक पुरुष र विराटनगर–५ मा एक पुरुषमा कोरोना संक्रमण पुष्टि भएको हो ।