अस्पताल निर्माणमा लापरवाही गरिएको भन्दै किम जोङ उन आक्रोशित

सोल-उत्तर कोरियाली शाशक किम जोङ उन प्योङयाङमा निर्माणाधिन अस्पतालको प्रगति प्रति आक्रोशित भएका छन् ।

अस्पताल निर्माणमा अति लापरवाही तथा गैर जिम्मेवारपनको हद भएको भन्दै आक्रोश पोखेका हुन् । उनले उक्त अस्पताल निर्माणमा लागिरहेका अधिकारीहरुलाई जिम्मेवारी मुक्त गराई अन्य सक्षम व्यक्तिलाई जिम्मेवारी दिन समेत भनेका छन् ।

सत्तारुढ वर्कर्स पार्टीको ७५ औँ स्थापना दिवसको अवसरमा घोषणा गरिएको महत्वकांक्षी परियोजना ‘प्योङयाङ जेनरल हस्पिटल’ अक्टुबर १० भित्रमा सक्न किमले निर्देशन दिएका थिए ।

स्थलगत निरिक्षणमा आशातित प्रगति नपाए पश्चात किम ले उक्त निर्देशन दिएको उत्तर कोरियाली सरकारी सञ्चार माध्यम केसिएनएले जनाएको छ ।

किमले उक्त अस्पताल निर्माणमा आर्थिक पारदर्शिता तथा जवाफदेयीताको चरम अभाव भएको बताउदै अस्पताल निर्माण समितिले काम गर्न नसकेको बताएका हुन् ।

किमले यहि गतिमा काम गइरहे अक्टोबर महिनामा अस्पताल निर्माण कार्य सम्पन्न हुनेमा आशंका व्यक्त गर्दै निर्माण गतिलाई तिव्रता दिन समेत निर्देशन दिएका छन् ।

कोरोना माहामारी फैलिन सक्ने तथा विरामीहरुको उपचारमा समस्या हुन सक्ने सम्भावनालाई मध्यनजर गर्दै किमले केही समय अगाडी पार्टीको स्थापना दिवसको अवसर पारेर उक्त अस्पतालको शिलान्यास गरेका थिए । किमले अस्पताल निर्माणमा भइरहेको ढीलाई बारे अध्ययन गरि विस्तृत जानकारी दिन समेत निर्देशन दिएका छन् ।