नेपाल भारत सीमामा गोली चल्यो, एक युवक सहित प्रहरी घाइते

काठमाडौं- सुनसरीमा प्रहरीको गोली लागि एक जना घाइते भएका छन् ।

घाइते हुने हरिनगर ७ सुकुम्बासी टोलमा बस्दै आउका २० वर्षीयका सहजव जट हुन् । पेटमा गोली लागेका बिपी कोइराला स्वास्थ्य प्रतिष्ठान धरानमा उपचार भइरहेको छ । सशस्त्र प्रहरी बोर्डर आउट पोष्टमा खटिएको टोली माथि शुक्रवार आक्रमण भएपछि प्रतिकार गर्दा गोली चलाएको जानकारी दिएको छ । तस्करीको विषयमा प्रहरीको हतियार खोस्न खोजेपछि झडप भएको थियो ।

जिल्ला प्रशासन कार्यालय सुनसरीका प्रमुख जिल्ला अधिकारी फणिन्द्रमणी पोखरेलले भने, “उनीहरुको समुहले तस्करीको विषयमा विवाद भएपछि प्रहरीको हतियार खोस्न खोजे, ढुङ्गा प्रहार भयो । त्यसपछि प्रहरीले गोली चलाएको हो ।”

त्यसैगरी घटनामा प्रहरी जवान जिवराज विसङ्खे पनि घाइते भएका छन् । दुबै जनाको धरानमा उपचार भइरहेको छ ।

बिहिवार मात्र सुनसरीकै सीमावर्ती क्षेत्र देवानगन्ज गाउँपालिका–३ स्थित पानी ट्याङ्की नजिक गए राति नेपाल प्रहरी र भारतीय तस्कर समूहबीच गोली हानाहान भएको थियो ।

गोलाबारीमा परी दुई जना तस्कर घाइते भएका थिए। देवानगन्ज–२ का राजेश यादव र ३ का पिन्टु यादव घाइते भएका थिए। तस्करका साथबाट प्रहरीले एउटा पेस्तोल, छ राउण्ड गोली र दुई वटा म्याग्जिन बरामद गरेको थियो ।