आइतबारदेखि ५ दिन ठूलो वर्षाको सम्भावना, सतर्क रहन आह्वान (भिडीयो सहित)

काठमाडौँ- आइतबारदेखि पाँच दिन देशभर निकै ठूलो वर्षा हुने र त्यसले व्यापक रूपमा बाढी र पहिरो निम्त्याउने भएकाले जोखिम क्षेत्रका बासिन्दालाई सुरक्षित स्थानमा गई ज्यान जोगाउन विज्ञले अपिल गरेका छन् ।

बाढी तथा पहिरोको जोखिम क्षेत्रमा रहेका बासिन्दालाई आइतबारदेखि ५ दिन पाहुना लागेरै भए पनि सुरक्षित स्थानमा गई ज्यान जोगाउन राष्ट्रिय जोखिम विपद् न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले सल्लाह दिएका छन्।

यो हप्ता देशैभर ठूलै वर्षा हुने र त्यसले पहाडमा पहिरो र तराईमा बाढीको प्रकोप व्यापक हुने देखिएकाले विशेषगरी सोमबारदेखि जोखिम क्षेत्रका बासिन्दालाई उच्च सतर्कता अपनाउन मौसम तथा विपद्सम्बन्धी निकायले गरेको संयुक्त अनुमानअनुसार प्राधिकरणले अनुरोध गरेको छ ।

शुक्रबार प्राधिकरणका कार्यकारी प्रमुख पोखरेलको अध्यक्षतामा जल तथा मौसम विज्ञान विभाग, खानी तथा भूगर्भ विभाग, ऊर्जा तथा जलस्रोत विभागसहितले संयुक्त पत्रकार सम्मेलन गर्दै साउन ४ देखि ८ गतेसम्म ठूलो पानी परी बाढी पहिरो जानसक्ने भएकाले सबैलाई सतर्क रहन आह्वान गरेका छन्।

यही साउन ४ देखि ८ गतेसम्म ठूलो पानी परेर फेरि बाढी, पहिरो जानसक्ने संभावना छ, सचेत बनौं, सतर्क रहौं, सुरक्षित होऊ… pic.twitter.com/Dk2birlvNW

— NDRRMA (@NDRRMA_Nepal) July 17, 2020