ओली-प्रचण्डबीच छलफल अनिश्चित

काठमाडौँ- सत्तारुढ नेकपाका अध्यक्षद्वय केपी शर्मा ओली र पुष्पकमल दाहाल प्रचण्डबीच पार्टीभित्र बढेको विवाद अन्त्यका लागि आज भेटवार्ता हुने/नहुने निश्चित भएको छैन।

स्रोतका अनुसार तीन दिनसम्म भएको छलफलमा पनि अध्यक्षद्वयबीच कुनै सहमती नभएपछि उनीहरुबीच थप छलफल अनिश्चित बनेको नेकपा ले जनाएको छ। सोमबारदेखि बुधबारसम्म लगातार तीन दिन ओली प्रचण्डबीच ‘वान टु वान’ वार्ता भएको थियो।

जारी स्थायी कमिटी बैठकमा प्रधानमन्त्रीसमेत रहेका ओलीले अध्यक्ष र प्रधानमन्त्री दुबै पदबाट राजीनामा दिनुपर्ने आवाज चर्को रुपमा उठेपछि नेकपाको विवाद उत्कर्षमा पुगेको छ। पटक पटक स्थगीत हुँदै आएको स्थायी कमिटी बैठक असार २६ गते बस्ने बताइएको छ।

प्रधानमन्त्री ओलीका प्रेस सल्लाहकार सूर्य थापाका अनुसार आज थप छलफल हुने नहुने निश्चित भएको छैन । ‘उहाँहरुबीच आज भेटवार्ता हुने/नहुने निश्चित भएको छैन,’ थापाले भने, ‘छलफलको लागि समय निर्धारण भएको छैन, के हुन्छ, ठेगान छैन।’

अर्का अध्यक्ष पुष्पकमल दाहाल प्रचण्डका प्रेस संयोजक विष्णु सापकोटा जुगलले पनि आज अध्यक्षद्वयबीच छलफलको लागि समय तय नभएको जानकारी दिए। उनले अध्यक्ष प्रचण्डसँग अन्य नेताहरुकाे छलफलको लागि पनि समय निर्धारण नभएको बताए।

बुधबार भएको छलफलमा ओलीले आफूले दुबै पद नछाड्ने अडान दोहोर्याएका छन्। यसबाट प्रचण्ड थप रुष्ट बनेको अड्कल काटिएको छ।