कोरियामा सिनेमाटोग्राफर सम्मानित

सोल-नेपाली कथानक चलचित्र डाइङ क्यान्डल (निभ्न लागेको दियो) का सिनेमाटोग्राफर तथा निर्माता रबिन आचार्यलाई दक्षिण कारियामा सम्मान गरिएको छ । नेपालीहरुको दोस्रो ठूलो चाड तिहारको लक्ष्मीपूजाको दिन सुकर्म समूहले सम्मान गरेको हो । दिदीभाइको सम्बन्धको चलचित्रलाई आचार्यले कुशलतापूवर्क खिचेका छन् ।

रसुवाको बिकट तामाङ गाउँ गत्लाङमा छायाङ्कन गरिएको चलचित्रमा एक दिनको कथालाई प्रस्तुत गरिएको छ । दिउँसो चारबाजेबाट रातको ११ वजे सम्मको घटनालाई कलात्मक देखाउने प्रयास भएको आचार्यले कार्यक्रममा बताएका थिए । उनले चलचित्र एउटै परिबारको कथा भए पनि रमाइलो बनेको बताएका छन् । चलचित्रमा सौगात मल्ल, शिर्जना सुव्वा, अर्पण थापा र लाक्पा सिंगे तामाङको मुख्य भूमिका रहेको छ ।

तिहारको अबसरमा दिदीभाइको त्यग र माया समेटिएको चलचित्र खिचेकोले आचार्यलाई सम्मान गरिएको सुकर्म समूहका अध्यक्ष मनोज कुमार सुबेदीले भने । यस अघि पनि आचार्य अमेरिकामा भएको क्वीन्स् फिल्म फेस्टिभलमा उत्कृष्ट सिनेमाटोग्राफरका रुपमा पुरस्कृत भएका थिए ।