उत्तर कोरिया विरुद्ध आन्दोलनरत समूहमाथि प्रहरी छापा

सोल-उत्तर कोरिया बिरोधि गतिविधि सञ्चालन गरेको आरोपमा दक्षिण कोरियाली प्रहरीले छापा मरेको छ।

उत्तर कोरियाबाट देश निकाला गरिएकाहरुको समूहद्वारा सञ्चालित दुई वटा गैर सरकारी संगठनमा प्रहरीले शुक्रबार छापा मारेको हो ।

प्रहरीले सरकारी नियम पालना नगरेको तथा दुई देशमा द्वन्द निम्त्याउन खोजेको भन्दै उनिहरुको कार्यालयमा छापा मारेको हो ।

सोल महानगरिय प्रहरीबाट गएको विशेष प्रहरी टोलीले ति कार्यालयहरुमा छापा मारेको समाचारमा जनाइएको छ ।

स्वतन्त्र उत्तर कोरियाको नारा सहित पार्क साङ हकको नेतृत्वमा चलिरहेको उत्तर कोरिया विरोधी आन्दोलनका कार्यालयहरु गाङनाममा रहेका छन् ।

हाल ति कार्यालयहरुको नेतृत्व भने पार्कका भाई पार्क जुन होले गरिरहेका छन् ।

‘उत्तर कोरिया स्वतन्त्रताका योद्धाहरु’ नाम दिईएको उक्त कार्यालयमाथि हिलियम बेलुनको साहायतामा उत्तर विरोधी सामाग्री त्यस तर्फ पठाएको आरोप लगाइएको छ ।

प्रहरीले विहान र दिउसो गरि दुई फरक समयमा दुइ वटा कार्यालयहरुमा छापा मारेको हो । केही कागजात फेला नपरे पनि प्रहरीले कार्यालयहरुमा सिलबन्दी गरेको छ ।

प्रहरीले ति कार्यालयहरुबाट महत्वपुर्ण कागजात फेला पार्ने सम्भावना रहेको जनाएको छ ।

कार्यालयमा छापा मारिएपछि संक्षिप्त प्रतिकृया दिदै नेता पार्कले भनेका छन्- ‘ भन्न नमिल्ला तर के दक्षिण कोरियामा लोकतन्त्र छ?’ उनले अगाडी भनेका छन्-‘ यो सरकारको घृणित कार्य हो । ‘ प्रतिकृयामा उनले अगाडी भनेका छन्-‘ मलाई दक्षिण कोरिया किम जोङ उनको गुलामी गरिरहेको आभाष भइरहेको छ ।’

दक्षिण कोरियाको एकिकरण मन्त्रालयले उत्तर कोरिया विरोधी गतिविधिलाई निश्तेज पार्न दिएको निर्देशन अनुरुप आफूले उनीहरुका गतिविधिहरुको शुक्ष्म निगरानी गरिरहेको तथा पाइएमा तत्काल बन्द गराउने सोल महानगरिय प्रहरीले बताएको छ ।