‘टुटल र पठाओलाई तुरुन्त कारबाही गर्छु’

काठमाडौं । यातायात व्यवस्था विभागका महानिर्देशक कुमारप्रसाद दाहालले गैरकानूनी रुपमा यात्रु ओसारिरहेका टुटल र पठाओलाई नियमको दायरामा ल्याउने बताएका छन् ।

सवारी तथा यातायात व्यवस्था ऐन- ०४९ को कानूनी व्यवस्था विपरित निजी नम्बरप्लेट भएका मोटरसाइकलले यात्रु ओसार्नु गैरकानूनी रहेको महानिर्देशक दाहालले बताए ।

“मोटरसाइकलले यात्रु बोक्नै हुँदैन भन्ने होइन । नेपालको विद्यमान कानूनमा मोटरसाइकलले यात्रु बोक्न पाइने व्यवस्था कतै पनि तोकेको छैन । कानूनले बञ्चित गरेको व्यवसाय सञ्चालन गर्नु गैरकानूनी हो,” महानिर्देशक दाहालले बाह्रखरीसँग भने, “निजी मोटरसाइकलले यात्रु बोक्न मिल्दैन । बोक्ने भए सवारी तथा यातायात व्यवस्था ऐनलाई संशोधन गर्नुपर्छ ।”

टुटल र पठाओजस्ता कम्पनीले मोटरसाइकलमा यात्रु ओसार्दा दुर्घटना भए यात्रुको बिमा सुरक्षित नभएकाले यो बढी जोखिमपूर्ण हुने महानिर्देशक दाहाल बताउँछन् ।

“यस्तो सवारी दुर्घटना हुँदा यात्रुको मृत्यु भए चालकलाई सार्वजनिक अपराध लाग्छ । १० वर्ष जेल जानुपर्छ । टुटल र पठाओले यात्रुलाई सेवा त दिएको छ तर यो सेवा गैरकानूनी हो, विकृति हो,” दाहालले भने ।

सार्वजनिक सवारीमा प्रति यात्रु ५ लाख बिमा सुरक्षित गरिएको हुन्छ । टुटल र पठाओजस्ता निजी सेवाले यात्रुको बिमा सुरक्षित गरेका हुँदैनन् । संसदले कानून संशोधन गरेर यस्ता सेवाका मोटरसाइकल चालकले लगाउने ड्रेस, मोटरसाइकलको नम्बरप्लेट, मोटरसाइकलको सिसि, रङलगायत मापदण्ड सरकारले तोकेको खण्डमा यो सेवा नेपालमा प्रभावकारी हुने महानिर्देशक दाहाल बताउँछन् ।

यता ट्याक्सी व्यवसायीहरु टुटल र पठाओले आफूहरुको रोजिरोटी खोसेको गुनासो गर्छन् । “सरकारले तोकेको नियम नमानेर निजी नम्बरप्लेट भएका मोटरसाइकलले भाडामा यात्रु ओसारेर भाडा लिइरहँदा पनि सरकारले केही कारबाही गरेको छैन । यस्ता मोटरसाइकललाई कारबाही गरिनुपर्छ,” उपत्यका ट्याक्सी व्यवसायी तथा चालक सेवा समाजका महासचिव पुरन तामाङले बताए ।

यसअघि पनि टुटल र पठाओविरुद्ध मुद्दा परेपछि यात्रु ओसार्न रोक लगाइएको थियो । व्यापक जनदबाबपछि प्रधानमन्त्री केपीशर्मा ओलीले मोटरसाइकलमा यात्रु ओसार्ने सेवाका लागि मध्यस्थता गर्ने ‘टुटल’ र ‘पठाओ’ लाई रोक नलगाउन निर्देशन दिएका थिए ।