लद्धाखमा २०सैनिक मारिएपछि मोदीले बोलाए सुरक्षा अधिकारीहरुको आकस्मिक बैठक

काठमाडौं- पछिल्ला दिनहरुमा चर्किइरहेको भारत चीन विवाद हिंसामा परिणत भए पश्चात नयाँ दिल्लीमा उच्च स्तरिय बैठक भएको छ ।

पछिल्लो पटक २० जना भारतीय सैनिकको लद्धाखमा चीनसँगको सिमा क्षेत्रमा भएको भिडन्तमा ज्यान गए पश्चात उच्च सरकारी तथा सुरक्षा अधिकारीहरुको बैठक बसेको हो ।

भारतीय प्रधानमन्त्री नरेन्द्र मोदी, गृह मन्त्री अमित शाह, रक्षा मन्त्री राजनाथ सिंह, परराष्ट्र मन्त्री एस जय शंकर, अर्थमन्त्री निर्मला सिथारमन, प्रधान सेनापती एमएम नरभाने बैठकमा सहभागी भएको भारतीय समाचार संस्था एनडीटिभीले जनाएको छ । हमलामा आफ्ना २० जना सैनिक मारिए पश्चात आकस्मिक बैठक राखिएको हो ।

पछिल्ला ५ दशकमा भारत चीन सिमामा कुनै पनि हिंसात्मक द्वन्द नभएको तथा कुनै किसिमको मानवीय क्षति समेत नभएको र हाल उत्पन्न परिस्थिति बारे बैठक केन्द्रीत भएको समाचारमा बताइएको छ ।

भारतीय सेनाले उक्त भिडन्तमा चीन तर्फका सैनिकहरुमा समेत क्षति भएको बताएको छ । सैनिक शुत्रका अनुसार उक्त भिडन्तमा चीन तर्फ पनि कम्तिमा ४३ जना सैनिकहरुको मृत्यु भएको अथवा गम्भिर रुपमा घाइते भएको बताइएको छ ।

भारतीय सैनिक अधिकारीहरुका अनुसार चिनिया सैनिकहरुले लामो समय सम्म भारतीय सैनिकहरुलाई लक्षित गर्दै ढुङ्गामुढा तथा रडहरु सहित आक्रामण प्रयास गरेका थिए । उनीहरुको भारतीय सैनिकहरुसँग लामो समय सम्म धक्का मुक्की समेत चलेको थियो ।

लदाखमा भएको घटनालाई लिएर भारत र चिनका आ-आफ्नै प्रतिकृयाहरु आइरहेका छन् । चिनले भारतिय सैनिकले सीमा पार गरेको आरोप लगाएको छ र घटनामा चिन तर्फ पनि केही मानवीय क्षति भएको बताएको छ यद्यपी संख्या भने खुलाएको छैन । भारतीय पक्षले भने चीनको उक्त दावा साँचो नभएको बताएको छ ।

संयुक्त राज्य अमेरिकाले हाल विकसित घटनाक्रमलाई लिएर दुबै देशहरुलाई संयमित भएर घटनालाई साम्य बनाउन तर्फ लाग्न भनेको छ । संयुक्त राष्ट्र संघले पनि घटनालाई जिम्मेवार भई वार्ताको माध्यमबाट समाधान गर्न आग्रह गरेको छ ।

भारत चीन विच हुने गरेका युद्धका घटनाहरु नयाँ भने हैनन् । सन् १९६२, १९६७, १९७५ मा समेत उक्त क्षेत्रमा भारत चिन युद्ध भएका थिए । पछिल्लो पटक सन् २०१७ मा चिनिया सेना दोकलाम क्षेत्रमा प्रवेश गरे पश्चात ७२ दिन उक्त क्षेत्र पुर्ण रुपमा बन्द समेत गरिएको थियो ।