दक्षिण कोरियाले लालीपप मात्र देखायो -उत्तर कोरिया

प्योङ्गयाङ्ग- उत्तर कोरियाले दक्षिण कोरियालाई उसका आगामी दिनहरु अझ बढी पश्चाताप तथा पिडादायी बन्ने बताएको छ । दक्षिण कोरियाली सरकारले आफुमा रहेको आत्मविश्वास पुर्ण रुपले गुमाइसकेको समेत बताएको छ ।

उत्तर कोरियाका युनाइटेड फ्रन्ट विभागका निर्देशक जाङ्ग कुम चुलले उत्तर कोरियाली समाचार संस्था केसिएनए सँगको कुराकानीमा दक्षिण कोरियाले आत्मविश्वास गुमाइसकेको बताएका छन् ।

हालै उत्तर कोरियाले दक्षिण कोरियामा जारी उत्तर विरोधी प्रदर्शनलाई मध्यनजर राख्दै दक्षिणसँग सम्बन्धित सम्पुर्ण सम्पर्क विच्छेद गरेको थियो ।

उक्त घटना पश्चात दक्षिण कोरियाले त्यहाँ भइरहेका उत्तर विरोधी प्रदर्शनलाई पुर्ण रुपमा बन्द गराएको छ । यता उत्तर कोरियाले भने उक्त घटनालाई उत्तर सँगको सम्बन्धलाई बचाउने यौटा नाटकको संघ्या दिएको छ ।

उत्तर कोरियाले दक्षिण कोरियामा भइरहेका उत्तर विरोधी गतिविधिहरु माथि कडा प्रतिकृया जनाउदै सन् २०१८ मा भएको सैन्य सम्झौता समेत बन्द गर्ने चेतावनी दिएको छ । उत्तरले सो घटनालाई सम्बन्ध सुधारका लागि गरिएका प्रयास ध्वस्त पारेको घटनाका रुपमा लिएको छ ।

दक्षिण कोरियाको ललीपप देखाउने प्रवृत्तिका कारण अब उत्तर कोरिया दक्षिण कोरियाको खेलौना नबन्ने पनि स्पष्ट पारेका छन् । उनले दक्षिण कोरियाले पहिले कबुल गरेका सन्धी सम्झौतामा समेत पारदर्शी नभएको बताउदै पटक पटक उत्तर कोरियालाई धोका दिएको समेत बताएका छन् ।

ज्वालामुखी जस्तै भएर सुरु भएको आन्दोलन साम्य पार्यौँ भनेर भन्नु हास्यास्पद भएको बताउदै उसले उत्तर कोरिया विरोधी आन्दोलन बन्द गर्न नसक्ने समेत बताएका छन् । उनले भनेका छन्- ‘यदि दक्षिणले आन्दोलन मथ्थर पारेँ भन्छ भने त्यो यौटा जोक मात्र हो ।’