उत्तर कोरियाको धम्की पश्चात दक्षिणमा उच्च सुरक्षा परिषदको बैठक

सोल-दक्षिण कोरियामा भइरहेका उत्तर कोरिया विरोधी प्रदर्शनहरुलाई लिएर उत्तर कोरियाले आक्रामक रणनीति लिए पश्चात दक्षिण कोरियाले आफ्नो देशका सुरक्षा निकायका उच्च अधिकारीहरुको आकस्मिक बैठक बसेको छ ।

बैठकमा हालैका दिनहरुमा बिकसित घटनाक्रम, उत्तरबाट आएका सुरक्षा चुनौति तथा दक्षिणले लिन सक्ने सुरक्षा निर्णय लगायतका बारेमा छलफल भएको छ ।

राष्ट्रपति कार्यालयमा राष्ट्रिय सुरक्षा विभागका निर्देशक छुङ ईवी युङ्को नेतृत्वमा उक्त आकस्मिक बैठक बसेको दक्षिण कोरियाली समाचार संस्था कोरियन हेराल्डले बताएको छ ।

बैठकमन हालै कोरियाली प्रायद्वीपमा विकसित घटना क्रम, उत्तर कोरियाका सम्भावित रणनीति लगायतका बारेमा छलफल भएको राष्ट्रपति कार्यालयका प्रवक्ता काङ मिन स्योकले बताएका छन् ।

दक्षिणमा भइरहेका उत्तर लक्षित प्रदर्शनहरुलाई लिएर उत्तर कोरियाबाट आईरहेका आक्रामक प्रतिकृया तथा हालसालै उत्तर कोरियाली सर्वोच्च नेता किम जोङ उनकी बहिनी किम यो जोङले अब दक्षिण सँगको सम्बन्ध सकियो भन्ने अभिव्यक्ति दिए पश्चात दक्षिण कोरियाले उक्त आकस्मिक तथा विशेष बैठक बोलाएको हो ।