सिरहाका २० सङ्क्रमित घर फर्किए

सिरहा – सिरहाको धनगढीमाई नगरपालिकास्थित महेन्द्र गेनाई मेमोरियल अस्पतालबाट २० जना कोरोनालाई जितेर मङ्गलबार घर फर्किएका छन् ।

उक्त अस्पतालको आईसोलेसनमा उपचार गराईरहेका २६ जनामध्ये एकै दिन २० जना कोरोनाबाट मुक्त भएर घर फर्किएको अस्पतालका मेसु डा सुभाष मण्डलले बताए ।

विभिन्न मितिमा कोरोना सङ्क्रमण पुष्टी भई अस्पतालको आईसोलेसनमा उपचार भईरहेका मध्ये सिरहाका १९ जना र सप्तरीका एक जना उपचारपश्चात निको भएर घर फर्किएको उहाँले जानकारी दिनुभयो । निको भएकालाई अस्पतालका मेसुसहित चिकित्सकले फुलमाला लगाएर घर पठाएका थिए ।

बाँकी ६ जनाको पनि स्वास्थ्य अवस्था समान्य रहेको र उहाँहरु पनि केही दिनभित्रै उपचार पश्चात घर फर्किने मेसु डा. मण्डलको भनाइ छ । यस्तै एकैदिन सिरहामा थप १२ जना कोरोना सङ्क्रमित थपिएका छन् ।

विभिन्न गाउँपालिकामा मङ्गलबार थपिएका सबै सङ्क्रमितलाई सो अस्पतालको आईसोलेसनमा ल्याउने तयारी भइरहेको सिरहाका प्रमुख जिल्ला अधिकारी सरोजप्रसाद गुरागाईँले जानकारी दिए ।

सिरहा नगरपालिकाका १० जना, सुखीपुर नगरपालिका र बरियारपट्टी गाउँपालिका १/१ जना गरी १२ जनामा कोरोना सङ्क्रमण पुष्टी भएको प्रजिअ गुरागाईँले बताए । योसँगै सिरहामा कोरोना सङ्क्रमितको सङ्ख्या ६१ पुगेको छ ।