जसपाको कानूनी अड्चन फुक्यो, वरीयता विवाद कायमै

काठमाडौँ – राजपा र समाजवादी पार्टी मिलेर बनेको जनता समाजवादी पार्टी (जसपा)ले दर्ताका लागि निर्वाचन आयोगमा निवेदनसहित आवश्यक कागजात बुझाएसँगै दल दर्ताको कानूनी अड्चन टुंगिएको छ । तर, शीर्ष नेताहरुको वरीयता विवाद भने यथावत छ । जसका कारण दल दर्तासम्बन्धी काम अगाडि बढाउन नेताहरुलाई सुरुदेखि नै सकस परेको थियो ।

आइतबार दिउँसो राजपा र समाजवादीका शीर्ष नेताहरुले कार्यविभाजन टुंगाएको जानकारी दिएका थिए । जसअनुसार संघीय परिषद अध्यक्ष बाबुराम भट्टराई, केन्द्रीय समिति अध्यक्ष महन्थ ठाकुर र उपेन्द्र यादव तथा वरिष्ठ नेता अशोक राई र राजेन्द्र महतो थिए ।

तर, अन्तिम समयमा ठाकुरले पहिलो वरियतासहित कार्यकारी अध्यक्षमा अडान लिएपछि विवाद उब्जिएको थियो । विवाद लम्बिदै जाने र ४५ दिनको समयसीमा नाध्ने खतरा भएपछि भट्टराई आफैंले अहिले वरिष्ठ नेतामा रहने गरी आयोगमा कागजात बुझाउने प्रस्ताव गरेका थिए । त्यसैअनुसार कागजात बुझाइएको र आपसी सल्लाहमा थप कार्यविभाजन हुने नेता नवराज सुवेदीले बताए ।

उनका अनुसार आयोगमा बुझाइएका कागजातमा पार्टीको बैठक बसेर आवश्यकताअनुसार परिमार्जन गर्ने र वरीयता टुंगाइने छ । सुरुमा पहिलो वरियताको अध्यक्षसहित संघीय परिषद् अध्यक्षमा भट्टराईलाई जिम्मेवारी दिने निर्णय थियो । ठाकुर र उपेन्द्र यादव क्रमशः दोस्रो र तेस्रो वरियतामा रहने र उनीहरुले कार्यकारी अध्यक्षको भूमिका निर्वाह गर्ने सहमति थियो ।

विवाद भएपछि आयोगमा बुझाएको कागजातमा ठाकुर र यादव कार्यकारी समितिको अध्यक्ष छन् भने अशोक राई, भट्टराई र राजेन्द्र महतोको नाम वरिष्ठ नेतामा छ । कान्तिपुर दैनिकबाट