जर्जियाका गभर्नरले भने- ‘शान्तिपुर्ण आन्दोलनमा मेरो साथ छ’

न्यूयोर्क-अमेरिकामा प्रहरी नियन्त्रणमा एक अश्वेत वर्गका व्यक्तिको मृत्यु पश्चात आन्दोलन चर्केको छ । आन्दोलन चर्के सँगै सरकारले कानुन परिमार्जनको कसरत थालेको छ भने देशका ४० बढी शहरहरुमा कर्फ्यु समेत लगाइएको छ ।

यता अमेरिकी शहर जर्जियाका गभर्नरले भने आन्दोलनकारीको पक्षमा रहेको बताएका छन् । गभर्नर व्रेन केम्पले आफ्ना जायज माग लिई शान्तिपुर्ण आन्दोलन गर्ने अधिकार सम्पुर्ण नागरिकमा निहित रहेको बताउदै त्यस्ता आन्दोलनमा आफ्नो समर्थन रहने पनि बताएका छन् ।

केम्पका अनुसार हरेक स्वतन्त्रताको सिमा हुने र आन्दोलनकारीले शान्तिपुर्ण आन्दोलनको बाटो परिवर्तन गरि हिंसात्मक बन्न खोजे त्यो आफूलाई सह्य नहुने समेत स्पष्ट पारेका छन् ।

हाल जवाफ भन्दा प्रश्न बढी हुने अवस्था भएको र यो स्वभाविक समेत रहेको बताउदै उनले जनतामा प्रश्न गर्ने अधिकार नैसर्गिक रहेको पनि बताए ।

जर्जिया मार्टिन लुथर किङ्गको जन्म भूमी भएको स्मरण गर्दै गभर्नर केम्पले हाल सम्पुर्ण अमेरिकी नागरिकले उनको वर्तमान अमेरिका बनाउन रहेको योगदान सम्झेर उनले जस्तै शान्तिपुर्ण आन्दोलन गर्न समेत सल्लाह दिएका छन् ।

हाल जर्जियाका केही स्थानहरुमा हिंसात्मक प्रदर्शन भईरहेको प्रति ईङ्गित गर्दै यदि कसैले हिंसालाई प्रोत्साहन गर्छ भने त्यसलाई रोक्न सरकार जस्तो सुकै कदम चाल्न समेत पछि नपर्ने स्पष्ट पारेका छन् ।