पर्वतमा पहिलो पटक कोरोनाका पाँचजना संक्रमित फेला

पर्वत – पर्वतमा पहिलो पटक कोरोनाका पाँचजना बिरामी फेला परेका छन् । फलेवास नगरपालिकाका दुई र महाशिला गाउँपालिकाका तीनजनामा कोरोना संक्रमण पुष्टि भएको गण्डकी प्रदेश स्वास्थ्य निर्देशनालयले जनाएको छ ।

फलेवास घर भई सदरमुकाम कुश्माको क्वारेन्टिनमा रहेका २० र ४० वर्षका दुई तथा महाशिला घर भई कुश्माको क्वारेन्टिनमा बसेका १९,२० र २१ वर्षका तीन जना पुरुषमा कोरोना संक्रमण देखिएको निर्देशनालयका निर्देशक डा बिनोदबिन्दु शर्माको भनाइ छ ।

उनीहरु सबैलाई उपचारका लागि जिल्ला अस्पतालको आइसोलेसनमा लैजाने तयारी भएको निर्देशक शर्माले बताए ।