दूतावासको घटना गम्भीर आतङ्की हमला भएको उत्तर कोरियाको ठहर

बीबीसी । गत महिना स्पेनमा रहेको उत्तर कोरियाली दूतावासमा अपरिचित समुहले छापा मारेको घटनालाई उत्तर कोरियाले गम्भीर आतङ्की हमला ठहर गरेको छ । उत्तर कोरियाका तर्फबाट आएको पहिलो आधिकारिक बयानमा सरकारले स्पेनलाई यसबारे गम्भीर अनुसन्धान गर्न आग्रह गरेको हो । घटनामा एफबीआइको पनि भूमिका रहेकाबारे आफूलाई जानकरी भएको उत्तर कोरियाले बताएको हो ।
बुधबार मात्र हमलामा किम शाषन विरोधी एक रहस्यमय संस्थाको हात रहेको जानकारी प्राप्त भएको थियो । सो समूहले किम परिवारको निरङ्कुश शाषनलाई जरैदेखि हटाउने संकल्प लिएको बताइएको छ । छिओलिमा सिभिल डिफेन्स, सीसीडी नामक सो समूहले दूतावासबाट कम्प्युटर, युएसबी लगायत विभिन्न डाटाहरु उठाएर लगेको अनि सबै प्रमाण एफबीआइलाई बुझाएको बताएको छ । हालसम्म यसमा संलग्न गिरफ्तारीका लागि दुईवटा अन्तराष्ट्रिय मुद्दा दर्ता भएका छन् ।
दूतावासका अनुसार हतियार सहित बलपूर्वक प्रवेश गरेको सो समूहले कुटपिट लगायत हिंसा समेत मचाएको थियो । कर्मचारीहरुसँग सोधपुछ गरिसकेपछि उनीहरुलाई त्यहाँबाट भाग्न प्रस्ताव गरेको र अस्वीकार गरेपछि उनीहरुलाई बेसमेन्टमा लगि बाँधिएको बताइएको छ । यसका संलग्न दुईजना अमेरिकी नागरिक भएको बताइएको छ ।