क्वारेन्टिन व्यवस्थापनमा सेना

काठमाडौँ- कञ्चनपुरका पाँच स्थानीय तहका क्वारेन्टिनको व्यवस्थापनमा नेपाली सेना खटिएको छ । जिल्ला सुरक्षा समितिको निर्णयअनुसार सिंहशार्दूल गुल्म भगतपुर ब्यारेकको टोली दुई दिनदेखि खटिएको हो ।

सो गुल्मका गुल्मपति सेनानी प्रणयजङ्ग मल्लले सुरक्षा समितिको निर्णयअनुसार महाकाली नगरपालिका, बेलौरी, पुर्नवास, बेल्डाँडी र लालझाडी गाउँपालिकामा खटिएको जानकारी दिएका छन् । “स्थानीय तहमा रहेका ठूला क्वारेन्टिनमा बसेर आवश्यक व्यवस्थापनको काम हामीले गर्दैछौं ।” उनले भने, “स्थानीय तहका अन्य स्थानमा रहेका क्वारेन्टिनको निगरानी र सुरक्षा सतर्कता बढाएका छौँ ।”

उनले स्थानीय तहसितको समन्वयमा सेना क्वारेन्टिनको व्यवस्थापनमा जुटेको बताए । यसअघि सेनाले गड्डाचौकी नाकामा भारतबाट आउनेको स्वास्थ्य जाँचमा समेत खटिएको थियो । त्यसैगरी आज नै उसले कोरोना सङ्क्रमणबाट मृत्यु भएकाहरुको शव व्यवस्थापनबारे यहाँ नमूना प्रदर्शन गरेको छ ।

सो गुल्म र २५ फिएको संयुक्त आयोजनामा नेपाल प्रहरी, सशस्त्र प्रहरी, महाकाली अस्पताल र जनस्वास्थ्यकर्मीलाई नमूना प्रदर्शन देखाइएको सेनाले जनाएको छ । “शव व्यवस्थापन गर्दा अपनाउनुपर्ने सुरक्षालगायत योजनाबद्ध व्यवस्थापन कसरी गर्छौँ भनेर प्रदर्शन गरिएको हो ।” सेनानी मल्लले भने, “भैपरी आउने सङ्क्रमण चुनौतीसित जुध्न सेना आवश्यक तयारी अवस्थामा छ ।”

झोलुङ्गे पुलमा तालाबन्दी

गड्डाचौकी मुख्य बाटो हुँदाहुँदै दोधारा चाँदनीबाट दैनिक सयौँ नागरिक भारतबाट स्वदेश फर्किन थालेपछि महाकाली नदीमा रहेको झोलुङ्गे पुलमा आज बिहानदेखि कञ्चनपुरको भीमदत्तनगरपालिका–१३ का स्थानीयवासीले तालाबन्दी गरेका छन् ।

“यो अन्तर्राष्ट्रिय नाका होइन”, भीमदत्तनगरपालिका–१३ का वडाध्यक्ष लालबहादुर शाहीले भने, “हामीले भारतबाट ल्याउनेलाई सुरक्षा सतर्कता अपनाएर लैजाऊ भनेका हौँ ।” उनले पुल क्षेत्रमा स्यानिटाइजेशन गर्नुपर्ने मागसहित स्थानीयवासीले तालाबन्दी गरेको बताए । “झोलुङ्गे पुल वारिपारि पनि ठूलो बस्ती छ, धमाधम भारतबाट रातभरि मान्छे ओसार्दा सङ्क्रमणको जोखिम छ ।” उनले भने, “स्वास्थ्य सुरक्षा सामग्री माग गर्दै नगरपालिका आएका छौँ ।”

माहाकाली नगरपालिकाबाट केही दिनयता झण्डै दुई हजार नागरिक भारतबाट स्वदेश भित्रिसकेका छन् । दशगजामा आएर अलपत्र रहेका नागरिकलाई सो नगरपालिकाले खानपिनलगायतको व्यवस्थापनमा जुटिरहेको छ ।