अमेरिकाले उत्तर कोरियाको आक्रमण नदेख्नेबारे शीर्ष जर्नेलको चेतावनी

एजेन्सी । दक्षिण कोरियामा अमेरिकी फोर्सका कमान्डरले बुधबार वासिङटन र प्योङयोङबीच निशस्त्रीकरणबारे जारी वार्ता सफल नभए, अवस्था तनावग्रस्त हुन पुगेमा अमेरिकासँग कोरियाली प्रायद्विपमा नजर राख्न पर्याप्त खुफिया साधन नभएको हुँदा अमेरिकाले उत्तर कोरियाले गर्न सक्ने हमला नदेख्नबारे चेतावनी दिएका छन् ।

निशस्त्रिकरण सम्बन्धी उत्तर कोरियाका गतिविधि अप्रत्यासित देखिएकाले पनि अमेरिकाले कुनैपनि सम्भावित आक्रामकता विरुद्ध आफ्नो सेना तयार राख्न जरुरी रहेको उनको भनाइ छ ।

पछिल्लो समय प्योङयोङले बारम्बार निशस्त्रीकरणको प्रतिबद्धता जनाइरहँदा डिएमजी क्षेत्रमा उत्तर र दक्षिण कोरियाबीचको तनाव कम भइरहेपनि हालसम्म उनीहरुको आणविक क्षमतामा कुनै प्रमाणित परिवर्तन देखा नपरेको हुनाले पनि जुनसुकै किसिमका जोखिमपूर्ण परिस्थितिसँग लड्न तयार रहनुपर्ने उनले बताए । त्यसैले उत्तर कोरियाले पूर्ण रुपमा आफ्नो परमाणु हतियार त्याग नगरेसम्म दक्षिण कोरिया, जापान, अमेरिका लगायत सबै क्षेत्रीय मित्रराष्ट्रहरु खतरामै रहेको उनले बताएका हुन् ।

त्यसैगरी गत हप्ता अमेरिकाका संयुक्त सेनाध्यक्ष जर्नेल जोसेफ डनफोर्डले पनि उत्तर कोरियाका मिसाइल अझै खतराको संकेत भएको उल्लेख गरेका हुन् । वासिङटनमा एट्लान्टिक काउन्सिलको एक समारोहमा बोल्दै उनले अमेरिकी सेना आफ्नो देश र सबै क्षेत्रीय मित्रराष्ट्रहरुको रक्षा गर्न पुर्ण रुपमा तयार रहनुपर्ने बताएका हुन् ।

अमेरिकी खुफिया विभागले पनि उत्तर कोरियाले अझै आफ्नो परमाणु क्षमता कायम राखिरहेको हुँदा मिसाइल कार्यक्रम बन्द गर्न असम्भव रहेको बताउने गरेको छ भने हतियार परीक्षणमा केही समय रोक लगाएपनि प्योङयोङ सजिलै पहिलेको अवस्थामा फर्किन सक्ने बताएको सीएनएनले जनाएको छ ।