बैज्ञानिक भन्छन् – ‘ट्रम्पले खाने कोरोना औषधि झन जोखिम’

काठमाडौं-अमेरिकाका राष्ट्रपति डोनाल्ड ट्रम्पले कोरोना भाइरसको संक्रमणबाट सुरक्षित रहन खाइरहेकाे मलेरियाको औषधिले  मृत्युको जोखिम झन बढाउने अनुसन्धानले देखाएको छ।

विज्ञान अनुसन्धान पत्रिका लान्सेटको गरेकाे अध्ययनले होइड्रोक्सिक्लोरोक्विन औषधि कोरोना संक्रमितले खाँदा उल्टै मृत्युको जोखिम बढाउने तथ्य पत्ता लगाएकाे वाशिङ्गटन पोस्टले समाचार लेखेको छ।

चिकित्सकले यो औषधि सेवन गर्नु घातक हुने चेतावनी दिँदै पनि कोरोना रोक्न यो उपयोगी हुने दाबी गर्दै ट्रम्पले आफूले खाइरहेको केही दिनअघि बताएका थिए।

लान्सेट जर्नलमा प्रकाशित अध्ययन प्रतिवेदनमा भनिएकाे छ: अध्ययनबाट के पत्ता लागेको छ भने काेराेना संक्रमितलाई मलेरियाकाे उक्त औषधिबाट फाइदा नभएकाे पाइयाे। बरु यसले उल्टाे मृत्युकाे जाेखिम बढाउने पाइयाे।