कोरोना न्यून भएपछि इटालीले ईयु पर्यटकलाई सीमा खुल्ला गर्ने

काठमाडौँ-कोरोना संक्रमणबाट विश्वमा नै धेरै प्रभावित बनेको युरोपेली मुलुक इटालीले चाँडै नै आफ्नो देशका सिमाहरु युरोपेली युनियनका पर्यटकहरुका लागि खुल्ला गर्ने जनाएको छ ।

जुन महिनाको सुरुवातबाट खुला गर्ने गरि तयारी भइरहेको सरकारी अधिकारीहरुले जानकारी दिएका छन् ।

युरोपेली युनियनका सदस्य राष्ट्रका नागरिकहरुलाई अनिवार्य १४ दिने क्वारेन्टाइन सहित देश प्रवेश गर्न दिने सरकारले जनाएको छ । संक्रमण दरमा कमी आए सँगै सरकारले आर्थिक गतिविधि सञ्चालनमा ल्याउने तयारी स्वरुप सो निर्णय गरिएको हो ।

प्रधानमन्त्री गियुस्पे कोन्टेका अनुसार सरकारले चाँडै नै जीम हल, सिनेमा हल आदि क्षेत्रहरु समेत सञ्चालनमा ल्याउने तयारी गरेको जानकारी दिएका छन् ।

सरकार कोरोना संक्रमण पुनः फैलन सक्ने बारेमा सचेत रहेको जानकारी दिदै उनले यहि त्रासमा आर्थिक गतिविधि सञ्चालनमा नल्याए कहिल्यै पनि सञ्चालनमा ल्याउन नसकिने उनले बताए ।

निश्चित सावधानी अपनाएर गतिविधि सुरु गर्नु हालको आवश्यकता रहेको पनि उनले बताएका छन् ।

इटालीले आधिकारीक रुपमा नाकाहरु बन्द नगरिएको तर सेञ्जेन राष्ट्रहरुले निति नियम बनाई अन्य देशमा प्रवेश नगर्न नागरिकहरुलाई अनुरोध गरेको थियो ।

करिव ३२ हजार भन्दा बढी ज्यान गएको इटालीमा अब साबधानी अपनाएर गतिविधि शुरु गर्न लागिएको तथा युरोपेली युनियनका सदस्य राष्ट्रहरुले पनि सोही अनुरुप अगाडी बढ्ने रणनिति लिएको उनले जानकारी दिएका छन् ।