कोरोनाले मृत्यु भएकी १० दिनकी सुत्केरीको अन्तिम संस्कार गरियो, परिवारले शव छुन पाएनन्

काठमाडौं – कोरोना भाइरसकका कारण मृत्यु भएकी सिन्धुपाल्चोककी २९ वर्षीया सुत्केरी सावित्रा चालिसेको अन्तिम संस्कार गरिएको छ।

साबित्राकाे शनिबार राति पशुपतिस्थित विद्युतीय शवदाहस्थलमा अन्तिम संस्कार गरिएकाे हाे । उनको बिहीबार बेलुका उपचारका लागि धुलिखेल अस्पताल ल्याउँदै गर्दा मृत्यु भएको थियो।

शनिबार बेलुकी कोरोना भाइरसका कारण उनको निधन भएको स्वास्थ्य मन्त्रालयले आधिकारिक रुपमा पुष्टि गरेपछि राति नै उनको शव अन्तिम संस्कारका लागि पशुपति ल्याइएको थियो।

उनको शव व्यवस्थापनमा तालिमप्राप्त जनशक्तिहरु संलग्न थिए। शव बोक्ने विशेष टोलीले उनको शव पशुपति आर्यघाटसम्म ल्याएको थियो। परिवारका सदस्यले भने उनको शव छुन पाएनन् ।