२ वर्षभित्र सरकारी कार्यलयको कारोबार नगदरहित हुने

काठमाडौँ-सबै सरकारी कार्यलयको कारोबार अबको २ वर्षभित्र नगदरहित बनाईने भएको छ ।

सबै भुक्तानी विद्युतीय माध्यमबाट गरिनेगरी २ वर्षभित्र नगदरहित बनाईने भएको राष्ट्रपति विद्यादेवी भण्डारीले जानकारी दिइन ।

डिजिटल नेपाल फ्रेमवर्क २०७६ लाई कार्यन्वयनमा ल्याउने पनि सरकारले जनाएको छ । उत्पादकत्व र उत्पादन अभवृद्धि गरी सामाजिक र आर्थिक रुपान्तरणका लागि पनि डिजिटल नेपाल फ्रेमवर्क २०७६ लाई कार्यन्वयन गर्दै थप विस्तार गर्नुको विकल्प नभएको उनले बताइन ।

यस्तै ईन्टरनेट सेवालाई थप विस्तार र व्यवस्थित गरिने भएको छ । ४ सय ३१ पालिका, ३ हजार ६ सय ३१ वटा वडा, २ हजार ५ सय ४६ स्वास्थ्य केन्द्र र २ हजार ९ सय ४८ सकारी माध्यामिक विद्यालयमा अहिले बोर्ड ब्याण्डको ईन्टरनेट पुर्याईएको राष्ट्रपति भण्डारीले बताइन ।

सेवा प्रदायकसँग साझेदारी गरी यसलाई थप विस्तार गर्ने सरकारले लक्ष लिएको छ ।

यस्तै सरकारी कार्यलयहरुले प्रयोगमा ल्याएका मोबाईल एप्सलाई एकीकृत गरी सहज र प्रविधिमैत्री बनाईने सरकारले जनाएको छ ।

उच्च हिमाली भेगमा ब्रोडब्याडसहितको ईन्टरनेट उपलब्ध गराउने पनि सरकारको लक्ष छ । अबको २ वर्षभित्र नेपालको आफ्नै स्याटलाईट स्थापना गरी सेवा प्रदान गरिने पनि सकारले जनाएको छ ।