शुक्रबारे बजारमा आगलागी, ७० लाखको क्षति

इलाम- सोमबार साँझ ९ः४५इलामको शुक्रबारे बजारमा भएको आगलागीबाट करिव ७० लाख बराबरको क्षति भएको छ।

३ घर पुर्ण रुपमा क्षति पुगेको आगलागी बेद कैयाको घरबाट सुरु भएको हो । कैयाको घरमा कोही पनि नभएको अवस्थामा आगलागी भएको नामसालिङ प्रहरी चौकी इन्चार्ज टेकराज गिरीले बताएका छन् । घरमा रहेको २ वटा मध्ये एउटा ग्यासको सिलिन्डर विष्फोट भएको थियो।

आगलागीबाट रुकमेणा प्रधानको घर र किराना पसल, छत्रकुमारी लावरको घर तथा कैयाको जुत्ता र कपडाको पसलमा क्षति पुगेको छ।

इलाका प्रहरी कार्यालय नयाँबजार, नामसालिङ प्रहरी चौकी र स्थानीयको सहयोगमा आगो विहान करिव ५ः४५ बजे पुर्ण रुपमा नियन्त्रणमा आएको थियो ।

गिरीले दमकल नहुँदा पानी ओसारेर आगो नियन्त्रणमा लिनु पर्ने भएकाले समय लागेको जानकारी दिएका छन् ।

आगलागीबाट घर पुर्ण रुपमा क्षति भएको पिडित परिवारलाई ५० हजार र लत्ता कपडा आज नै राहत स्वरुप प्रदान गरिने माईजोगमाई गाउँपालिकाका अध्यक्ष जीतबहादुर राईले जानकारी दिएका छन् ।