ह्वाइट हाउसमा मास्क अनिवार्य, ट्रम्प अझै पनि मास्ककाे विपक्षमा

एजेन्सी – अमेरिकी राष्ट्रपतिको कार्यालय ह्वाइट हाउसमा मास्क अनिवार्य गरिएपछि राष्ट्रपति डोनाल्ड ट्रम्प भने अझै मास्कको विपक्षमा उभिएका छन् ।

राष्ट्रपति ट्रम्पका एक सुरक्षा सहयोगी तथा उपराष्ट्रपति माइक पेन्सकी प्रेस सेक्रेटरीमा कोरोना भाइरसको संक्रमण पुष्टि भएपछि ह्वाइट हाउसले आफ्ना सबै कर्मचारीले राष्ट्रपति कार्यालय प्रवेश गर्ने बेला मास्क अनिवार्य रुपमा लगाउन निर्देशन दिएको हो ।

सबै कर्मचारीले आफ्नो डेस्कमा बस्दा बाहेक हरेक समय मास्क लगाउनु पर्ने छ । डेस्कमा बस्दा वा अरु बेला पनि कर्मचारीबिच भौतिक दूरी कायम गर्नु पर्ने निर्देशन पनि दिइएको द न्यूयोर्क टाइम्सले जनाएको छ ।

राष्ट्रपति ट्रम्पले आश्वयक परेकाले अनिवार्य मास्कको नियम ल्याइएको बताएका छन् । पत्रकार सम्मेलनमा मास्क बिनै उपस्थित भएका ट्रम्पले आफूले सो नियम पालना गर्नु नपर्ने बताए । आफू सबैसँग पर रहेकाले मास्क लगाउनु नपर्ने उनको दाबी छ ।

ह्वाइट हाउस कोरोना भाइरस टास्क फोर्सका तीन शीर्ष सदस्य आइसोलेशनमा गएको भए पनि ट्रम्पले भने मास्क नलाउने बताउँदै आएका छन् ।