कपिलवस्तुका २ कोरोना संक्रमित ४ दिनअघि भारतबाट आएका थिए

कपिलबस्तु – बिहीबार राति कोरोना संक्रमण पुष्टि भएका कपिलवस्तुका दुुईजना भारतबाट ४ दिनअघि आएका खुलेको छ । लकडाउनकै बीच भारतको मुम्बईबाट चार दिनअघि उनीहरु नेपाल आएका प्रहरीले पुष्टि गरेको हो ।

कपिलवस्तुुको मायादेवी गाउँपालिका ८ विजुवाका १६ र २२ वर्षका उनीहरुका वैशाख २३ गते कपिलवस्तुको पकडी नाकाको दक्षिणतर्फको खुला सीमाबाट नेपाल आएका हुन् ।

लुकेर नेपाल आएका उनीहरुलाई स्थानीयले मायादेवी गाउँपालिकाकै तीर्थादेवी छत्रपाली माविको क्वारेन्टाइनमा राखेका थिए ।

दुई जनाकै थ्रोट स्वाबको परीक्षण भैरहवास्थित प्रदेश जनस्वास्थ्य प्रयोगशालामा किट अभावका कारण राष्ट्रिय जनस्वास्थ्य प्रयोगशाला टेकु पठाइएको थियो । योसँगै नेपालमा कोरोना संक्रमितको संख्या १०१ पुगेको छ ।