नेकपा स्थायी कमिटी बैठक अनिश्चित, सचिवालय बैठक निष्कर्षविहीन

काठमाडौं – बिहीबार बस्ने भनिएको सत्तारुढ नेपाल कम्युनिष्ट पार्टी (नेकपा) को स्थायी कमिटी बैठक नबस्ने भएको छ ।

प्रधानमन्त्री निवास बालुवाटारमा बसेको नेकपाको सचिवालय बैठकमा एजेण्डाबारे कुरा मिल्न नसकेपछि भोलीको बैठक स्थगित भएको प्रधानमन्त्री ओलीका प्र्रेस सल्लाहकार सूर्य थापाले जानकारी दिएका छन् ।

दुई अध्यक्षबीच स्थायी कमिटी बैठक र यसको एजेण्डाबारे छलफल भएपनि सहमति जुट्न नसक्दा स्थायी कमिटी बैठक नै प्रभावित हुने भएको हो । तत्कालका लागि स्थायी कमिटी बैठक नै आवश्यक नरहेकोले बैठक नबस्ने पक्षमा प्रधानमन्त्री ओली छन् ।

यसअघि वैशाख २० गतेको सचिवालय बैठले भोली बिहीबार स्थायी कमिटी बैठक बस्ने निर्णय गरेको थियो । त्यसको अघिल्लो दिन आज बुधबार सचिवालय बैठक बसेर एजेण्डा तय गर्ने भनिएपनि शीर्ष नेताहरुबीच कुरा मिल्न नसकेको हो ।

अध्यादेश प्रकरण लगायत विषयमा बैठकमा विवाद बढेपछि बुधबारको सचिवालय बैठकको बीचमै प्रधानमन्त्री एवं नेकपाका अध्यक्ष ओली जानकारी गराएर बाहिरिएका नेकपाका प्रवक्ता नारायणकाजी श्रेष्ठल बताए ।