जापानमा कोरोना पीडित व्यवसायीहरुलाई आर्थिक साहायता दिईने

टोकियो- जापानको टोकियो महानगर सरकारले कोरोना संक्रमणका कारण आपतकाल घोषणा गरिएको समयमा बन्द गरिएका साना तथा मझौला व्यवसायीहरुलाई आर्थिक साहायता गर्ने भएको छ ।

महानगरले प्रधानमन्त्री सिञ्जो आवेले आपतकाल लम्ब्याएको एक दिन पश्चात सो घोषणा गरेको हो ।

महानगर सरकारले आगामी सोमबारबाट उक्त साहायता बाँड्ने जानकारि दिएको छ । सरकारी अधिकारीहरुका अनुसार महानगरले पहिले घोषणा गरिए अनुरुप नै साहायता वितरण गरिने बताएको छ ।

महानगरले एउटा मात्र व्यवसाय हुनेलाई ५० हजार येन तथा एक भन्दा बढी व्यवसाय हुनेलाई १ लाख येन साहायता गर्ने जनाएको छ ।

हाल राजधानी टोकियोका व्यवसायीहरुका लागि गर या मरको स्थिति भएका कारण आफूले सक्दो सहयोग गरेको मेयर युरिको कोइकेले बताएका छन् ।

उनका अनुसार हाल टोकियोमा १ लाख ३० हजार व्यापार व्यवसायहरु सञ्चालित रहेका छन् । ति व्यवसायहरुलाई सम्बोधन गर्न करिव १९२ बिलियन येन बराबरको पुरक बजेट छुट्याइएको पनि उनले बताएका छन् ।

राहत साहायता पाउने व्यवसायहरुमा रेष्टुरेन्ट, बार, लाईभ म्युजिक हल, लगायतका रहेका छन् । सरकारले कोरोना संक्रमण दर तीब्र रुपमा बढ्न थालेपछि भीडभाड हुने त्यस्ता स्थान तथा व्यवसाय बन्द गर्न निर्देशन दिएको थियो ।

त्यसैगरि महानगर सरकारले खाद्यान्न पसलहरुमा अनावश्यक भीडभाड हुनेस्थिति सृजना हुन नदिन किनमेल गर्दा मितव्ययी हुन समेत अनुरोध गरेको छ ।

हालसम्म जापानको राजधानी टोकियोमा कोरोना संक्रमितहरुको संख्या ४७०० भन्दा बढी छ जुन जापानका ४७ प्रान्तहरु मध्ये सबै भन्दा बढी हो ।

यस अघि दक्षिण कोरियाले सबै नागरिकलाई परिवार संख्याको आधारमा आर्थिक सहयोग प्रदान गरेको छ |