दक्षिण कोरियामा आजदेखि लकडाउन अन्त्य

सोल- दक्षिण कोरियाले आफ्नो देशमा कोरोना संक्रमण शुन्य भएसँगै जनजिवन सामान्य बनाउने तर्फ अगाडी बढेको छ ।

संक्रमण न्यून भए सँगै सरकारले जारी रहेको लकडाउन पनि अन्त्य गर्ने तयारि गरेको छ । कोरोना संक्रमण तीब्र भए पश्चात सुरु गरिएको लकडाउन करिव ४५ दिन पुग्दा उसले संक्रमण शुन्य बनाए सँगै सामान्य जनजिवन सुरु गर्ने हेतुले लकडाउन अन्त्य गर्ने जनाएको हो ।

प्रधानमन्त्री चुङ सेइ क्युनले बताए अनुसार आजबाट कोरियाली सरकारले लकडाउनका नियमहरु परिमार्जन गर्दै विस्तारै सामान्य जनजिवन सुरु गर्ने तयारि सरकारले गरेको छ । निश्चित सावधानीहरु अपनाएर सार्वजनिक कार्यक्रम तथा जमघटलाई पनि अनुमति दिन लागिएको प्रधानमन्त्री क्युनले बताएका छन् ।

प्रधानमन्त्री क्युनले कोरोना बिरुद्धको लडाईमा सरकारको साथ दिने सम्पुर्ण जनता तथा राष्ट्र सेवक कर्मचारी, स्वास्थ्यकर्मीहरुलाई समेत धन्यवाद दिएका छन् ।

आजबाट संग्राहलय, पुस्तकालय तथा प्रदर्शनी कक्षहरु खुला गरिने पनि जनाएका छन् । ईनडोर गेमहरु समेत सोही दिनबाट सुरु गर्ने उनले बताएका छन् ।

क्युनले यदि हालकै परिस्थितिको निरन्तरता भएमा विद्यालयहरु पनि चाँडै नै खोलिने बताएका छन् । हाल सम्मको रोग तथा प्रकोप नियन्त्रण केन्द्रको तथ्यांकमा कोरियामा १० हजार ८ सय एक जना संक्रमित भएका छन् । केन्द्रका अनुसार पछिल्ला ३ दिनमा कोरियामा एक जना पनि संक्रमित पाइएका छैनन् ।