कुवेतमा रहेका ३ हजार नेपालीलाई नेपाल फर्काईने, नेपाल सरकारलाई अन्यौल

काठमाडौं – वैदेशिक रोजगारीका लागि कुवेत पुगेका करिब तीन हजार नेपालीलाई त्यहाँको सरकारले फिर्ता पठाउने भएको छ । कुवेतले ३ हजार नेपालीलाई नेपाल फर्काउने भएसँगै नेपाल सरकार अन्यौलमा परेको छ।

कुवेत सरकारले गत अप्रिल १ देखि नै त्यहाँका आप्रवासी कामदारलाई घर फिर्तीका लागि एम्नेष्टीको ‘आकर्षक प्याकेज घोषणा गरेको थियो।

त्यसमा नेपालको पालो २६ अप्रिल देखि ३० सम्म राखेको थियो। तीन हजार भन्दा बढी नेपालीले आवेदन दिएको दूतावास अधिकारीले जानकारी दिएका छन् ।

साउदी अरेबियाले पनि कोभिड अघि घोषणा गरेको एम्नेष्टी खोल्न सक्नेछ भने त्यस्तै एमनेस्टी यूएईले पनि गर्न सक्ने दूतावास अधिकारीले परराष्ट्र मन्त्रालयलाई जानकारी गराएका छन्।

यता मलेसियाले पनि फर्कनेका लागि आइतबार सूचना जारी गरिसकेको छ। साउदी, कतार, युएई, मलेसिया, कुवेत अधिक नेपाली कामदार रहेको मुलुकमा पर्छन्। एमनेस्टी बाहेक नियमित आउन नपाएर बसेका नेपाली पनि खाडी मुलुकबाट लकडाउन खुल्ने वित्तिकै आउन सक्नेछन्।

फर्कन सक्ने नेपालीको विषयमा परराष्ट्र मन्त्रालयले अध्ययन प्रतिवेदन नै बनाइरहेको छ। यसरी नेपाली फर्कने अवस्थालाई कसरी सम्बोधन गर्ने भनेर आफूहरु अन्तर मन्त्रालय छलफलमा रहेको र दूतावासहरूबाट प्रतिवेदन माग गरी तयारी अघि बढाइएको परराष्ट्रमन्त्री प्रदीप ज्ञवालीले बताएका छन् ।